Білім сайысында бақ сынасты
Маңғыстау облысы бойынша меншікті тілші
Түбек теміржолында Дүниежүзілік еңбекті қорғау күні аталып өтті. Маңғыстау магистральдық желі бөлімшесінде сала қызметкерлерінің білімі мен біліктілігін сынайтын танымдық әрі тартымды іс-шара ұйымдастырылды.
Бөлімшеге қарасты 8 мекемеден құралған командалар, білім сайысына түскен іс-шараға қатысушылар зор белсенділік танытты. Жарыс үш кезеңнен тұрды. Бірінші кезеңде жалпы сұрақтар берілсе, екінші кезеңде ойын қиындай және қызықты бола түсті. Бұл жолы қатысушылар қауіпсіздік ережесі, еңбек қорғауға байланысты тақырыптық сұрақтарға жауап берді. Үшінші кезең теміржолшыны нағыз ширататын сәт болды. Ситуациялық тапсырмалар қойылды. Осы шартты орындау арқылы командалар әрқалай жағдайда аспай-саспай дұрыс әрекет ету мүмкіндігін көрсетті. Олардың тапқырлығы мен шұғыл шешім қабылдай алу деңгейі сынға түсті.
Жалпы, барлық команда жоғары дайындық пен белсенділік танытып, тартысты әрі қызықты ойын үлгісін көрсетті. Нәтижесінде үздік командалар анықталып, марапатталды. I орынды Қалпына келтіру пойызынан құралған команда, II орынды Маңғыстау жол дистанциясының, ал III орынды Маңғыстау белгі беру және байланыс дистанциясының командалары иеленіп, кәсіподақ тарапынан жүлде алды. Ойынға қатысушы қалған командаларға да ынталандыру сыйлықтары табысталды.
– Осындай іс-шаралар еңбекті қорғау мәдениетін арттыруға және қауіпсіздікке деген жауапкершілікті күшейтуге ықпал ететіні бесенеден белгілі. Біз мұндай бағыттағы басқосуларды жиі өткізіп тұрамыз және нәтижесін көріп те жүрміз. Бөлімшеде және оған қарасты мекемелерде жыл сайын еңбекті қорғау күні әртүрлі деңгейде аталып өтеді, – дейді Маңғыстау магистральдық желі бөлімшесінің еңбек қорғау және экология бөлімінің жетекші инженер-экологы Фариза Бекболсынова.