Сауатты әрекет етті

Маңғыстау теміржол вокзалында өткен кезекті оқу-жаттығу сценарийіне сәйкес «Семей-Маңғыстау» жолаушылар пойызының сегізінші вагонынан «Белгісіз этиологиялық қызба» деген күдікпен бір жолаушы анықталды.

«Семей-Маңғыстау» бағытындағы жолаушылар пойызының 8-вагонында келе жатқан 1994 жылы туған азаматтың дене қызуының жоғарылауы, бас ауруы, әлсіздік, жүрек айну сияқты шағымдармен жүгінгені туралы ақпарат ең алдымен 24 сәуір күні сағат 08:45 уақытында Маңғыстау теміржол вокзалы диспетчеріне келіп түседі. Жолаушылар пойызының келетін уақыты 09:05 минут...  

Небәрі 20 минут қалды, осы уақыт ішінде тиісті қызметтердің қатысуымен қауіптің алды алынып, қатердің жолы кесілуі тиіс.

Көліктегі санитарлық-эпидемиологиялық бақылау департаменті, Мұнайлы аудандық санитарлық-эпидемиологиялық бақылау басқармасы, Мұнайлы аудандық көпбейінді орталық аурухана, «ҚТЖ» ҰК» АҚ Маңғыстау магистральдық желі бөлімшесі, «Жолаушылар тасымалы» АҚ «Батыс» аймақтық филиалының Маңғыстау телімі, Маңғыстау станциясындағы желілік полиция бөлімі жедел хабарланып, ауру белгісі анықталған жағдайда індетке қарсы және індеттің алдын алудың жедел шараларын жүргізуге кіріседі.  

Маңғыстау бөлімшелік көліктегі санитарлық-эпидемиологиялық бақылау басқармасы мамандары дереу хабарландыру сызбасын қолданысқа енгізеді. Науқас адамды көзбен көріп, ахуалды анық білмегендіктен аса қауіпті жұқпалы ауруға қатысты күдік анықтаған жағдайда қолданылатын іс-шаралар тізімі жоспарға сай жасақталды. Әрі қарай барлық іс-шара оқу-жаттығуға қатысқан жоғарыдағы қызметтердің өзара тығыз, ұйымдасқан әрекетімен жүйелі түрде жүргізіліп, жарты сағатта қауіп-қатердің алдын алып, ең бірінші кезекте пойыз жолаушыларының қауіпсіздігін қатамасыз ете білудің үлгісі көрсетілді.  

– Қауіпті ауруға күдікті жолаушы отырған вагонға барып, ережеге сай әрекет бастадық. Алдымен науқасты басқа жолаушылардан оқшауладық. Медицина қызметкерлері алғашқы көмек көрсетілген соң жолаушыдан «Белгісіз этиологиялық қызбаға» қарсы зертханалық зерттеуге сынамалар алынып, эпидемиологиялық анамнез жүргізілді. Науқаспен қарым-қатынаста болған жолау- шыларға термометрия өткізіліп және сауалнама толтырылды. Ос ы жолаушылар вагонында бірге келген жолсеріктердің де, 25 жолаушының да дене қызуы тексеріліп, қауіпті белгі табылмады. Барлық жұмылдырылған қызметтер мен ведомстволар өз қызметін толық көлемде, уақытылы орындап, оқу-жаттығу сәтті аяқталды деуге болады. Ең бастысы тиісті қызметтер сауатты әрекет етіп, жоғары дайындықтарын көрсетті, – дейді Маңғыстау бөлімшелік көліктегі бақылау басқармасының басшысы Әсет Сұлтанов.