Атырау теміржолшылары жаңартылған Ата Заңның маңызын талқылады
Атырау облысы бойынша меншікті тілші
1 шілдеден бастап Қазақстан жаңа конституциялық кезеңге қадам баспақ. Бұған дейінгі Қазақстан Республикасының Конституциясы өз күшін жойып, оның орнына түбегейлі жаңартылған Ата Заң қолданысқа енгізіледі.
Соған орай жуырда Атырау магистральдық желі бөлімшесінің директоры Аралбай Қосымбаев бөлімшеге қарасты мекеме басшыларының қатысуымен маңызды жиын өткізді. Жиын барысында Ата Заңның қоғамдағы орны мен маңызы кеңінен талқыланып, заң үстемдігін сақтау мен азаматтық жауапкершілікті арттыру мәселелері қозғалды.
– Жаңартылған Ата Заң мемлекеттік басқару жүйесін қайта құрып қана қоймай, билік тармақтарының арақатынасын жаңа деңгейде айқындауды көздейді. Сарапшылар жаңа Конституцияны тәуелсіз Қазақстан тарихындағы ең ауқымды саяси реформалардың бірі деп бағалап отыр. Құжатта билік институттары ғана емес, азаматтардың құқықтары мен бостандықтарына қатысты нормалар да қайта қаралған. Жаңа Конституцияға сәйкес елдегі дәстүрлі қос палаталы Парламент жүйесі жойылады. Оның орнына бір палаталы жаңа заң шығарушы орган – Құрылтай құрылады. Екіншіден, Жаңа жүйеде алғаш рет вице-президент лауазымы пайда болады. Бұл қызмет бұрынғы мемлекеттік кеңесші институтының орнын басады. Үшіншіден, Конституциялық мәртебеге ие жаңа орган – Қазақстан Халық кеңесі құрылады. Бұл орган азаматтық қоғам мен мемлекеттік билік арасындағы диалогты күшейтуге бағытталған консультативтік алаң ретінде бағалануда, – деген бөлімше басшысы Ата Заңға енгізілген барлық жаңашылдықтар туралы әңгімелеп, жиын барысында оның негізгі аспектілері талқыланып, маңызы түсіндірілді.