Теміржолдағы 40 жылдық еңбек

Жол жөндеуші – темір жолдағы ауыр жұмыстың бірі.  Қытымыр қыста да, ми қайнатқан аптап ыстықта да ашық далада, қар мен жауын астында жүретін жолшылар еңбегінің адалдығында шек жоқ.

Атырау жол дистанциясында табан аудармастан аттай қырық жыл еңбек еткен Нұрберген Ибрашев Өтебайұлы осы жолдан өткен маман. Бір адамның ғұмыры дерлік еңбек жолында ол талай қиыншылықтарды бастан кешірді. Қазіргідей техника мен технология дамымаған, көп жұмыс қолмен жасалған кезде де мойымады, адал еңбектеніп, бала-шағасын өсірді. Әу баста Гурьев жол дистанциясында жол монтері болып жұмысын бастаған ол рельс жағалап, шойын жолдың рельстері мен шпалдарын бекітіп, бұрандаларын қатайтып жүріп тәжірибе жинады. Жылдар өте 4-ші дәрежелі жол монтері болды, одан жол бригадиріне жоғарылады. Қандай телімді тапсырса да, соның әр қадамын қадағалап, рельстің аралық өлшемі, орнатылуы, бекітілуі, нығыздығы деген секілді талаптарына үлкен жауапкершілікпен қарайтын кәсіби маманды әріптестері де шын сыйлап, құрмет тұтты.    

– Өмір – өзен, зулап жатқан уақыт қой. Міне, сонша жылды артқа тастап, зейнет жасына да жетіп қалыппыз. Өткен еңбек жылдарыма алғыстан басқа айтарым жоқ. Темір жол мен үшін қайнаған еңбек майданы болды, сол еңбектен ләззат алып, өсіп-өндік, есейдік, қартайдық. Енді зейнетін көрер шақ келді. Туған дистанциям менің екінші отбасымдай болды, осындағы өткен жылдарым мақтаныш мен үшін, – деп ағынан жарылды Нұрберген Өтебайұлы.

Нұрберген қоғамдық жұмыстарға да белсене қатысқан жан, әсіресе спортқа жаны құмар. Футбол, баскетбол, волейболдан жарыстарға қатысып, жүлделі орындарды да иеленіп жүрді. Жары Райхан екеуі әдемі отбасын құрып, ұл да, қыз да өсірді.  Ұлдары Нұрбек әке жолын қуып теміржолшы мамандығын қалады. Бүгінде ол рзд.402-де кезекші.  

Нұрберген Ибрашевті Атырау магистральдық желі бөлімшесі директоры Аралбай Қосымбаев құттықтап, қазақы жолмен жары Райхан екеуіне шапан жауып, ақ жол тілеп, шығарып салды.