Сыр өңірінде жүк тасымалы жаңа деңгейге көтерілді
Қызылорда облысы бойынша меншікті тілші
Сыр өңірінің тыныс-тіршілігі мен экономикалық даму қарқынын теміржолсыз елестету мүмкін емес. Өндіріс өркендеп, кәсіпорындар қуаты артып, аймақтың әлеуеті еселеніп жатса, оның артында аймақ экономикасының күретамыры теміржол көлігі тұр.
Бөлімше директорының орынбасары Мейрамбек Шолтабаевтың айтуынша, соңғы он жылда Қызылорда жүк тасымалы бөлімшесі күрделі реформалар кезеңінен сүрінбей өтті. 2016 жылдан басталған құрылымдық өзгерістер аясында Локомотив сервис орталығы мен ВЧД мекемелерінің бір арнаға тоғысуы басқару тиімділігін арттырып, тасымал тізбегін жаңа деңгейге көтерді. Бұл жаңғыру бөлімшенің өндірістік қуатын күшейтіп қана қоймай, локомотив паркін басқаруда заманауи әрі жүйелі тәсіл қалыптастырды.
Бүгінде бөлімше аймақтағы ең ірі индустриялық жобалардың сенімді тірегіне айналды. Шиелі өңіріндегі «Гежуба Шиелі Цемент» зауыты іске қосылғалы бері жүк тиеу көлемі бірнеше есеге артып, тек 2023 жылдың өзінде 626 мың тоннадан астам цемент жөнелтілді. Бұл – өндіріс пен темір жолдың өзара үйлесімді жұмысының нақты нәтижесі.
Сондай-ақ Қызылорда торабы арқылы «Орда Гласс» шыны зауытының өнімдері жүйелі түрде тасымалданып, 2025 жылы жүк көлемі 2686 вагонға дейін жетті. Бұл көрсеткіш өңірдегі өнеркәсіп әлеуетінің артып келе жатқанын білдіреді. Сонымен қатар Сексеуіл бағыты бойынша «Xinglianhe» ЖШС рудаларын тасымалдаудың басталуы бөлімшенің халықаралық транзиттік маңызын арттырып, экспорттық мүмкіндігін кеңейтті.
Бөлімшенің табысты жұмысының тағы бір маңызды бағыты – инфрақұрылымды жаңғырту. Қызылорда локомотив депосы мен айналым деполарында жүргізілген күрделі жөндеу жұмыстары, жаңа әкімшілік-тұрмыстық кешендердің іске қосылуы, техникалық пункттер мен өткелдердің, басқа да нысандардың жаңартылуы – еңбек адамдары үшін қолайлы орта қалыптастыруға бағытталған нақты қадамдар. Ал АСУ ЭММ цифрлық жүйесінің енгізілуі бөлімшенің технологиялық тұрғыдан заман көшінен қалмай, жаңа индустриялық дәуірге нық қадам басқанын көрсетеді.
– Қызылорда бөлімшесінің әр жетістігінің артында теміржолшылардың тынымсыз еңбегі жатыр. Біз үшін ең басты міндет – жүк тасымалының қауіпсіздігі мен сапасын қамтамасыз ету ғана емес, сонымен қатар теміржолшы мамандығының беделін арттырып, жас мамандарға қолдау көрсету, – дейді бөлімше директорының орынбасары Мейрамбек Шолтабаев.
Сондықтан бөлімше кадр даярлау мәселесіне ерекше назар аударып келеді. Мысал келтіре кетсек, соңғы 10 жыл ішінде бөлімше базасында 145 машинист даярланып, 136 маман кәсіби деңгейін көтерген. Бұл – тәжірибе мен білім сабақтастығының нақты көрінісі.