Атырау облысында бес вокзал дайын
Атырау облысы бойынша меншікті тілші
Үкімет отырысында Атырау облысының әкімі Серік Шәпкенов аймақты темір жол вокзалдарының құрылыс барысы туралы баяндады, деп хабарлайды Атырау облысы әкімінің баспасөз қызметі.
Облыс басшысы өңірде теміржол инфрақұрылымын ауқымды жаңғырту жұмыстары аясында Қазақстан темір жолымен бірлесіп 9 вокзал қайта жөндеуден өтіп, жаңадан салынып жатқанын жеткізді. Қазіргі таңда ғимараттардың бәрінде құрылыс жүріп жатыр. Осы жылдың қыркүйек айына дейін аймақтағы Исатай, Жамансор және Мұқыр станцияларындағы вокзалдарда құрылыс-монтаждау жұмыстары аяқталады. Ал, Мақат, Сағыз, Доссор, Аққыстау және Құрманғазы станциясының вокзалдары қазірдің өзінде толық дайын.
«Осы бес станцияда ескірген құрылыстардың орнына мүлдем жаңа ғимараттар бой көтерген. Жаңартылған вокзалдарда қасбеттер, инженерлік және санитариялық желілер ауыстырылып, заманауи жарықтандыру мен навигация орнатылып жатыр. Кедергісіз орта қалыптастыруға ерекше көңіл бөлініп келеді. Ғимараттарда пандустар, заманауи ана мен бала бөлмелері, сондай-ақ мүгедектігі бар адамдарға арналған арнайы аймақтар жабдықталып жатыр. Жоспарда көтергіш платформалард орнату да қарастырылған», деп мәлімдеді облыс басшысы.
Ал Атыраудың теміржол вокзалында2026 жылдың соңына дейін қайта жаңғырту жұмыстарын толық аяқтау жоспарланып отырған көрінеді.