Батыс Қазақстан және Алматы облыстарында теміржол вокзалдарын қайта жаңарту аяқталды
Қайта жаңартудан кейін Батыс Қазақстан және Алматы облыстарында теміржол вокзалдары пайдалануға берілді деп хабарлайды Rail-news.kz.
Батыс Қазақстан облысында 1937 жылы салынған Қазақстан станциясының вокзалын қайта жаңарту аяқталды. Вокзал күн сайын орта есеппен 300 жуық жолаушыға қызмет көрсетеді. Жоба аясында қасбет пен ішкі үй-жайлар жөнделіп, инженерлік коммуникациялар жаңғыртылды, іргелес аумақ абаттандырылып, заманауи жиһаздар мен жабдықтар орнатылды. Жұмыстарды орындау кезінде отандық өндірістің құрылыс материалдары пайдаланылды.
Қазақстан станциясы арқылы Алматы, Орал, Астана, Маңғыстау облыстарымен, сондай-ақ Ресей Федерациясымен байланысты қамтамасыз ететін 12 жолаушылар пойызы қатынайды.
Алматы облысында қайта жаңартудан кейін Қонаев станциясының 1978 жылы салынған теміржол вокзалы ашылды. Жұмыс барысында қолданыстағы конструкцияларды ішінара бөлшектей және ауданын ұлғайта отырып, ғимаратты қайта құру орындалды, қасбеті, ішкі үй-жайлары, инженерлік желілері, жолаушылар платформасы және іргелес аумақ жаңартылды. Мобильділігі төмен жолаушыларға қолжетімділікті қамтамасыз ету үшін пандуспен жабдықталған, сондай-ақ өрт қауіпсіздігі талаптарына сәйкес келетін жаңа эвакуациялық шығу жолдары орналастырылған. Қайта құру кезінде қазақстандық өндірістің құрылыс материалдары пайдаланылды.
Қонаев станциясының вокзалы тәулігіне орта есеппен 45 жолаушыға қызмет көрсетеді. Станция арқылы Алматы, Семей, Өскемен, Павлодар, Қызылорда және Қазақстанның басқа қалаларымен, сондай-ақ Ресей Федерациясымен байланыс орнататын 12 жолаушылар пойызы қатынайды.
Нысандарды қайта құру ҚТЖ-ның өз қаражаты есебінен жүзеге асырылады және жолаушылар сервисінің сапасын арттыруға, қауіпсіздікті қамтамасыз етуге және өңірлердің тұрғындары мен қонақтары үшін қолайлы жағдайлар жасауға бағытталған.
