Атырауда жарты жылда 29,7 шақырым теміржол күрделі жөндеуден өтті

Атырау магистральдық желі бөлімшесі бойынша биылғы жарты жылда жол сапасын орташа бағалау 56 балды құрап, орындалуы 27 балл немесе 220 пайызға жетті.

Соның ішінде ПЧ-9 – Атырау жол дистанциясы бойынша 37 балл немесе 175 пайыз, ал ПЧ-11 – Құлсары жол дистанциясы бойынша орындалуы 16 балл немесе 265 пайыз. Демек, аймақта жол сапасы жыл сайын жақсарып келе жатқаны байқалады.  

Бөлімше басшысының бірінші орынбасары Аманқос Жылқышиевтің айтуынша, биылғы межеленген жұмыстар кезең-кезеңмен атқарылып келеді. Яғни биыл Құлсары жол дистанциясына қарасты Құлсары-Бейнеу учаскесінде, рзд.Майкөмген-рзд467-рзд468 аралығында 29,732 км жолды күрделі жөндеу жұмыстары жүргізіліп, қазіргі уақытта толықтай аяқталып отыр. Күрделі жөндеу жұмыстары барысында жолдың ескі темір жолы түгел алынып, орнына су жаңа темірбетонды шпалдар барлық технологиялық талаптар сақталып салынған.  

Сондай-ақ жолды орташа жөндеуден өткізу, бұрмаларды ауыстыру және жол бойында малдың шығуына қарсы қоршау тұрғызу жұмыстары қоса жүргізілген. Жарты жылда жоспардағы 9,2 км жолды орташа жөндеуден өткізу бойынша оның 4,534 км орындалды. Атырау және Құлсары жол дистанциялары бойынша барлығы 26 дана бұрма ауыстырылып, 74,6 км жол бойында малдың шығуына қарсы қоршау тұрғызу жұмыстары бойынша 41 шақырымда шұңқыр қазылып, сым тарту үшін 10 шақырымға бағаналар орнатылған. Сонымен қатар бөлімшеде 260 жасанды имарат, яғни 59 көпір, 129 тұрба, 70 су ағатын астау тексеріліп, тазалық жүргізіліп, жай-күйі қадағалануда.