Екпінді станциясында 800 метр жол жаңарды

Өткен жылы бөлімше бойынша 42,073 км жолға күрделі жөндеу жұмыстарын жүргізген аймақ теміржолшылары ағымдағы жылы 83,2 км жолды күрделі жөндеуден өткізіп, технологиялық талапқа сай етуді жоспарлап отыр. Қазіргі таңда осы меженің үдесінен шығу үшін жөндеу жұмыстары қарқынды жүргізіліп жатыр.

Қызылорда жол дистанциясының еншісінде биыл 32,910 км күрделі жөндеу жоспарланған. Қазіргі таңда жұмыс Ағадыр машиналандырылған жол дистанциясының көмегімен Екпінді станциясында жүргізіліп жатыр. Жөндеу жұмыстарына тиесілі толаскез уақыты ауа-райының қолайсыздығына байланысты таңертеңгілік немесе кешкі уақыттарға реттестірілуде. Егер уақытты олай орайластырмаған жағдайда ми қайнатар шілденің ыстығы таңалакеуімнен күшіне еніп бастап, айналаның апшысын қуыра жөнеледі де, жұмыс жасамақ түгіл емін-еркін ауамен тыныстауға мұрша бермейді. Дегенмен осындай адам төзгісіз жағдайда жұмыс істеп жүрген жолшылардың күнделікті жұмысы ерлікпен пара-пар дер едік.  

Күні кеше дистанцияның Шиелі – Екпінді телімінде 800 метрлік аумаққа отандық рельс тізбектері төселді. Толаскез уақыты жарияланған бойда УК кранының көмегімен ескі рельс тізбектері сөгіліп алынып, «Четра» ауыр тракторы жердің беткі қабатын сүріп, сосын сүрілген аумақ автогрейдермен қайта тегістелді. Әрине, топырақ қабатын 40-50 сантиметрге дейін сүріп шығып орнын тегістеп жаңа рельс тізбектерін төсеуге даярлау айтуға жеңіл, ауыр салмақты алып тракторлар кемінде бірнеше рет тактикалық маневрмен жер қабатын тегістеп шықты. Жол төсемі технологиялық талапқа сай тегістелгеннен кейін УК көтергішінің көмегімен РШР тізбегі төселді.  

Рельс тізбегін төсеу кезінде әсіресе тізбектерді түйістіре төсеу кезінде дәлдік пен жолшыға тән шеберлікке басымдық беріледі. Қос жолақты рельс болғанда екеуара салыстырмалы қашықтық арнайы құрал көмегімен үнемі өлшем жүргізу арқылы үнемі бағыт нысанада сақталады. Ал жалғыз жолақты жолда жолшылардың өз пайымымен дайын төсемді қуалай төсем жасалына береді де, ЭЛБ, ВПО, ХДВ секілді арнайы жол техникаларының көмегімен жаңа жолды түзулеу, рельс тепе-теңдігін теңгеру, жол төсемі қабатын нығыздау, қиыршық тас төсеу, көтеру секілді процестер технологиялық талап бойынша арнайы техникалармен жасалынып, жол бабына келтіріледі де жол пайдалануға беріледі.

– Жаңа салынған жолдың технологиялық талапқа сай сапалы болуын қадағалап отырмыз. Екпінді учаскесіндегі толаскезге тап-тұйнақтай дайындық жасап кірістік. Ағадыр машиналандырылған жол дистанциясы берілген уақытты тиімді пайдалану үшін атқарылатын жұмыстарды алдын ала есептеп алып іске кірісті. Жұмысқа қажетті техника, қиыршық тас тасымалдайтын вагон, рельс-шпал торларын жеткізетін арнайы жылжымалы құрамдар түгел жұмылдырылған, 5 бульдозер, 2 автогрейдер және 5 автотехника тәулік сайын құрылыс қарқынын үдетуде. Ағадырлық жолшылар 800 метрлік аумақтың жолын жаңадан төсеп шықты. Атқарылып жатқан жұмыстардың сапасы салмақты, технологиялық талаптар сауатты орындалуда. Осы учаске бойынша осыған дейін берілген толаскез кезінде 8901 метр жаңа жол салынды, – деп ақпар берді Қызылорда жол дистанциясының бас инженері Ахметқали Елеусінов.