Шу теміржолшылары мен полиция бірлескен рейд өткізді

Темір жол және автобан арқылы еліміздің оңтүстігі мен солтүстігін, шығысы мен батысын байланыстырып жатқан Шу қаласы – нағыз тоғыз жолдың торабы. Тораптық станцияның негізгі үш теміржол өткелінде «Заң мен тәртіп» тұжырымдамасы аясында «Қауіпсіз өткел» акциясы өтті.

Шу жол дистанциясының жауапты қызметкерлері ұйымдастырған рейдтік іс-шараға Шу станциясындағы желілік полиция және аудандық полиция бөлімінің Жол және техникалық инспекция тобының, Шу станциясындағы вагондарды дайындау пункті коммерциялық қауіпсіздік бекетінің қызметкерлері қатысты.  

– 3745-шақырымдағы Тоғай өткелі арқылы жүк және жолаушылар пойыздарымен қатар, автокөліктер көп өтеді. Ал 3731-шақырымдағы «ХимПарк» – өңірдегі арнайы экономикалық аймаққа барар жолмен қиылысады. Ол маңда өнеркәсіптік нысандар көп орналасқандықтан, жүк көліктерінің қозғалысы жоғары. Ал 3748-шақырымдағы Қонаев өткелінің маңызы – қалаішілік және қаламаңы жолдарымен байланыстырады. Үш өткел де қала аумағындағы көлік пен пойыз қозғалысы қиылысатын маңызды әрі қауіпті аймақтар. Сондықтан көлік жүргізушілеріне шлагбаум жабық тұрғанда немесе тыйым салатын сигнал жанғанда тоқтап, жолдың ашылғанын күту қажеттігі түсіндірілді, – дейді Шу жол дистанциясының өндірістік-техникалық бөлімінің жетекші инженері Ерлан Жадыраев.  

Рейд кезінде дистанцияның өндірістік оқу шебері Серік Михабаев пен Ерлан Мәлікұлы жүргізушілерге қауіпсіздік ережелері жазылған жадынамалар таратты.  

Сондай-ақ полиция бөлімінің Жол және техникалық инспекция тобының полиция лейтенанты Әлішер Атан, Шу станциясындағы вагондарды дайындау пункті коммерциялық қауіпсіздік бекетінің полицейі, полиция кіші сержанты Дос Жанболат көлік иелеріне бағдаршамның қызыл түсі жанып, белгі берілгенде жол ережелерін сақтамаған көлік жүргізушілеріне ауызша ескертуден кейін заң талаптары бойынша жазбаша хаттама толтырылатынын жеткізді. Шлагбаум жабылған сәттегі іс-әрекеттер алгоритмі пысықталып, оны қатаң сақтаудың қаншалықты маңызды екені түсіндірілді.