Қызылордалық теміржолшылар жүк тасымалын табысты үйлестіріп отыр

Қызылорда ЖТ бөлімшесіне қарасты Қызылорда агенттік пункті – Белкөл мен Жалағаш станциялары арасындағы бірнеше бекеттегі жүк тасымалының тұрақты жүргізілуін үйлестіретін маңызды нысан. Агенттіктегі ауысымдық тәсілмен еңбек ететін тауар кассирлері мен жүк қабылдап-тапсырушылар өздеріне тиесілі міндетті тапсырмаларды қалтқысыз орындап келеді.

Нәтижесінде бөлімшедегі құрылымдық өзгеріске қарай реттестірілген тасымал үдерісі қазіргі таңда бұрынғы қарқынын жоғалтпай, керісінше еселене түскен.  

Қызылорда агенттігі пунктінің бастығы Алмас Ұзақбайұлы ұсынған ақпар бір ғана Қызылорда станциясындағы өндірістік жұмыс көрсеткіштері – осының дәлелі. Мәселен шілде айында 678 вагонға жүк тиелсе, 1135 вагоннан жүк түсірілген. Ал жыл басынан бергі жеті айда станция теміржолшылары 3642 вагонға жүк тиесе, 7502 вагоннан жүк түсірген. Вагондардың түрлері жабық, ашық, жартылай вагон, цистерна секілді әртүрлі санатта болуы да жүк операциясының өзіне тән ерекшеліктерін айқындайды. Берілген вагонның жағдайы, оның құжаттарының рәсімделіп, жүк операциясы қаражатының реттестірілуі біршама уақыт алатындықтан мұндағы жұмыс шапшаңдықты, дәлдікті, шеберлікті талап етеді.  

– Біздің басты міндетіміз – пойыздардың қозғалыс қауіпсіздігін сақтай отырып станцияға келген жүкті дер кезінде түсіріп, шыққан жүкті тиеу. Тиелетін негізгі жүк – тұз бен күріш, Шыны зауытынан шығарылатын өнімдер және тағы да басқа тұрмысқа қажетті заттар. Жүк негізінен Ресей мен Өзбекстан мемлекеттеріне жіберумен қатар еліміздің барлық облыстарына да жөнелтіледі. Ал станцияға келетін жүктің басым бөлігін құрылыс заттары, коммерциялық өнімдер, тұрмыстық заттар құрайды, – дейді агенттік пункт басшысы.

Жалпы станциялық жолдардан бөлек 47 кірме жолда жүк тиеу-түсіру жұмыстары атқарылады. Жұмыстың басым бөлігі Алтын қамба, Шыны зауыты, МЧ бағыты және М54-бағытында. Қазіргі таңда агенттік пункт тәулігіне орта есеппен 50-60 вагонға қызмет көрсетеді.  

Агенттік басшысы Алмас Ұзақбайұлы ұжым тәжірибелі теміржолшылар мен білікті мамандардан жасақталғанын жеткізді. Олардың қатарында жүк вагондарына қатысты қаржылық айналымды шебер ретке келтіретін аға тауар кассирі Фарида Кеңесбаеваны, тауар кассирі Ақжарқын Тастыбаеваны, келген-кеткен вагондардың жүгіне қатысты жұмыстарды кәсіби деңгейде атқаратын аға жүк қабылдап-тапсырушы Мәдина Тұяқбаева мен жүк қабылдап-тапсырушылар Еркебұлан Надырбеков, Жарас Өтепалиев, Оңдасын Абзаловты ерекше атап өтті.  

– Станциядағы жұмыс ауқымы ең алдымен қауіпсіз қозғалыс, шапшаңдық пен кәсіби шеберлікті талап ететіні белгілі. Осы кәсіби дағды аталған теміржолшылардың бәрінде қалыптасқан. Ең бастысы өзара түсінісіп, ынтымақпен әрекет ету біздерге тапсырылған меженің жоғары деңгейде орындалуына мүмкіндік беріп келеді, – дейді агенттік басшысы.