Семей қаласында теміржол вокзалын қайта жаңғырту жұмыстары жалғасуда
Қазақстан Республикасы Көлік министрлігі Теміржол және су көлігі комитеті төрағасының орынбасары Елдос Нестай Семей қаласындағы теміржол вокзалын қайта жаңғырту жұмыстарының барысымен танысты, деп хабарлайды Rail-news.kz.
Қазіргі уақытта нысанда шатырды орнату, сыртқы және ішкі әрлеу жұмыстары, жылытумен желдету жүйелерін, сумен жабдықтау және кәріз жүйелерін орнату, сондай-ақ электр монтаждау жұмыстары жүргізілуде. Жөндеу жұмыстары жүргізіліп жатқан кезеңде жолаушылар үшін уақытша қызмет көрсету пункттері ұйымдастырылған.
Тексеру барысында орындалып жатқан жұмыстардың сапасына және белгіленген мерзімдердің сақталуына ерекше назар аударылды. Өз кезегінде Елдос Нестай жұмыстардың қарқынын барынша жеделдетіп, оларды белгіленген мерзімде аяқтауды тапсырды.
Сондай-ақ вокзал ғимаратындағы ішкі жұмыстар мен оған іргелес аумақты абаттандыру шараларын қатар және кешенді түрде жүргізу қажеттігі атап өтілді. Бұл ретте жаңартылған вокзал мен оған іргелес аумақтың заманауи талаптарға сай болуына және жолаушыларға қолайлы жағдай жасауына ерекше назар аудару қажет.
Семей қаласындағы вокзалды қайта жаңғырту Мемлекет басшысы Қасым-Жомарт Тоқаевтың тапсырмасы бойынша іске асырылып жатқан теміржол вокзалдары инфрақұрылымын жаңғырту жөніндегі ауқымды бағдарламаның бір бөлігі болып табылады. Бағдарлама аясында еліміз бойынша 124 теміржол вокзалы жаңғыртылуда, оның 10-ы Абай облысында орналасқан.
Өңірде Ауыл, Белағаш, Дегелең, Шар, Үшбиік, Жарма және Жалаңашкөл станцияларындағы теміржол вокзалдары толық жаңартылып, пайдалануға берілді.
Жолаушылар инфрақұрылымын жаңғырту жұмыстары жолаушыларға қызмет көрсету сапасын арттыруға, қолайлы жағдай жасауға және теміржол инфрақұрылымы нысандарын заманауи талаптарға сәйкестендіруге бағытталған.