Жаңашылдық тиімділікке бастайды

Бөлімшенің солтүстігіндегі Сексеуіл локомотив пайдалану депосы өзіне жүктелген міндетті мінсіз атқарып, өңірдегі жүк пен жолаушы тасымалының кідіріссіз қозғалысын қамтамасыз етіп келеді.

Солтүстігінде Шалқар, шығысында Қоскөл және оңтүстігінде Қазалы станциялары аралығына қызмет көрсететін депо жұмысында жетістік жоқ емес.  

Атап айтқанда, Сексеуіл депосы заманауи «Trip Optimizer» жүйесін өндіріске сәтті енгізіп, локомотивтердің жоспардан тыс жөндеуге ағытылуын 39 жағдайға азайтқан. 34-ТЭ33А сериялы 31 тепловозға орнатылған «Trip Optimizer» жүйесі локомотивті басқару тиімділігін арттырып, отынды ұтымды әрі үнемді пайдалануға кең жол ашып отыр.  

Депо бастығының орынбасары Еркебұлан Аяғановтың мәлімдеуінше, заманауи технология жұмысты жетілдіре түскен, өндірістік жұмыстар уақытында, тиянақты әрі нәтижелі орындалуда. Локомотивтердің жоспардан тыс жөндеуге ағытылу көрсеткішінің айтарлықтай төмендеуі осының айқын дәлелі. Бұл көрсеткіш деподағы техникалық қызмет көрсету сапасының артқанын, сонымен қатар әрбір маманның өз ісін үлкен жауапкершілікпен атқаратынын көрсетсе керек.  

Қазіргі таңда Сексеуіл локомотив пайдалану депосында қысқы кезеңге дайындық мақсатында күзгі комиссиялық байқауға қызу әзірлік жұмыстары жүріп жатыр. Бүгінгі таңда депоның локомотив паркінде 34-ТЭ33А, 7-2ТЭ25КМ және 4-ТЭМ сериялы темір тұлпарлар бар. Олардың техникалық жай-күйін тұрақты бақылауда ұстап, дер кезінде күтім жасап, сенімділігі мен пайдалану ұзақтығын, тиімділігін арттыру – депо ұжымының басты ұстанымы.  

– Жыл басынан бері межеленген жоспарлы міндеттемелер түгел орындалды.  

Күн сайын мыңдаған тонна жүк пен жүздеген жолаушы мінген пойыздарды межелі жеріне аман-есен жеткізу – машинистерге жүктелген қасиетті міндет. Біздің депода заманауи технологияларды тез меңгеріп, пойыздардың қозғалыс қауіпсіздігі мен тұрақты тасымал үдерісін қамамасыз етіп отырған мамандар да, мақтаулы машинистер бригадасы да аз емес. Олардың қатарында локомотивті жөндеу және бақылау бөлімінің бастығы Берік Басбақбаевтың, локомотив қабылдаушылар Сәбит Қарабасов пен Хангелдин Төрединовтің, инженер-жабдықтаушы Бауыржан Сейтеновтің, ТҚК-2 ауысым шебері Сәкен Наурызбаевтың еңбегін ерекше атап өткім келеді. Осы депоға талай жыл маңдай тері сіңіп, тынымсыз еңбек етіп келе жатқан осындай мамандардың еңбегі арқасында Сексеуіл депосының қашан да шоқтығы биік, – дейді депо бастығының орынбасары Еркебұлан Аяғанов.