Үш мыңға жуық вагон көмір
Биылғы сәуір-қазан айлары аралығында өңірге салмағы шамамын 188 мың 965 тоннаны құрайтын 2 734 вагон көмір жеткізілген.
Соның ішінде, өндіріске арналған көмір көлемі 1 965 вагон болса, 258 вагон коммерциялық және 383 вагон бюджеттік бағыттағы қатты отын екен. Олар Жіңішке, Карауылкелді, Мартөк, Қандыағаш, Әйтекеби, Ащы сай, Жем, Шалқар, Бершүгір станцияларына жөнелтілген.
«2018-2019 жылдарға арналған жылыту маусымына техникалық көмірге қажеттілікті қамтамасыз етуді ұйымдастыру жұмыстары тиісті деңгейде жүріп жатыр. «ҚТЖ» АҚ-ның Ақтөбе Жүк тасымалы филиалы бойынша 345 тонна көмір түсті. Жоспар бойынша техникалық көмір 345 тоннаға жетуі тиіс, яғни бұл бағыттағы жұмыс толық орындалды. Ал «ҚТЖ» ҰК» АҚ Ақтөбе магистральдық желі бөлімшесі бойынша 3 370,27 тонна техникалық көмірді жеткізу жоспарланған болатын, бүгінде бұл меженің орындалуы 61 пайызды құрап отыр. Батыс аймақтық «Вагонсервис» жолаушылар вагондарын жөндеу бойынша техникалық қажеттіліктерге арналған көмірмен жабдықтау жоспары 14,667,67 тоннаны құрайды. Мұнда қазіргі уақытқа дейін нақты жеткізілгені 8171 тоннаны құрайды», – дейді Ақтөбе ЖТ бөлімшесінің техникалық бөлім бастығы Жасұлан Рысқалиев.
Ал 2018-2019 жылдар аралығында жол жүру бекеттерінде, 3-5-класты станцияларда жұмыс істейтін қызметкерлер мен зейнеткерлерді тұрмыстық көмірмен қамтамасыз етуді ұйымдастыру жұмыстары да өңірде жүз пайызға орындалған. «Темiржолсу» АҚ-мен жасасқан шартқа сәйкес тұрмыстық көмірді жеткізу жоспары 1035 тоннаны құрайды. Бұл жұмыстар 100 пайызға орындалған. Сонымен қатар, 3-5-кластағы станцияларда жұмыс істейтін қызметкерлер мен зейнеткерлерді тұрмыстық көмірмен қамтамасыз етуді ұйымдастыру 99,2 пайызға орындалған.
Ардақ ЕРУБАЕВА, Ақтөбе