Маңызды жүктер тасымалы бақылауда
Брифингке шұғыл бөлімнің басшысы Ермек Төлешов, логистика бөлімінің басшысы Нұрлан Қанаев, техникалық бөлімнің басшысы Ильяс Нұржанов қатысты. Теміржол саласының мамандары журналистерге «Қазақстан темір жолы» ұлттық компаниясының қызметкерлері тұтынушыларға қажетті жүктерді уақытылы әрі сапалы жеткізуді абыроймен атқарып келе жатқанын жеткізді. Айталық, бүгінгі таңда жүк жөнелтушілердің тапсырыстарын орындау үшін Компания қабылдап жатқан шаралар ерекше маңызға ие болып отыр.
Компания алдына қойылған міндеттемелерінің бірі әлеуметтік маңызды жүктер – бидай, көмір және ұнды тасымалдау. Осыған орай, осы жылдың 10 айында Шымкент жүк тасымалдау бөлімшесі бойынша 9 млн 505 мың 805 тонна жүк тиеліп, 9 млн 186 мың 974 тонна жүк түсірілген.
Шымкент бөлімшесі осы тұрғыда алға қойылған жоспарларды толығымен орындап келеді. Қазіргі таңда көмір тасымалдаумен 30-дан аса мекеме айналысып келеді. Олардың арасында ВИП-М, Азамат-Мұнай, Санас және т.б. мекемелер бар. Түркістан облысы мен Шымкент қаласы бойынша 2018-2019 жылғы жылыту маусымында қатты көмір отынын пайдалану жоспары 1 млн 300 мың тонна болса, тасымалданғаны 1 млн 144 мың тонна немесе 88%. Соның ішінде бюджеттік мекемелердің жоспары 174,6 мың тонна көмір болса, тасымалданғаны 174,6 мың тонна немесе 100%.
Шымкент қаласы бойынша жоспар – 5 500 тонна болса, тасымал 100% орындалды. Кентау ЖЭО-5 – жоспары 87 мың тонна болса, тасымалданғаны 57 000 тонна, яғни норма бойынша үш айлық қор жиналған. Түркістан жылу жоспары – 15 600 тонна болса, тасымалданғаны – 6 000 тонна. Норма бойынша екі айлық қор жиналған. Арыс жылу жоспары – 3914 болса, тасымалданғаны – 2 900 тонна, мұнда да үш айлық қор жиналған.
«Көмір отыны мәселесі бойынша Түркістан облысы және Шымкент қаласы әкімдігінің тиісті департаменттерімен бірлесіп, тығыз байланыста жұмыс жасаудамыз. Жұмыс барысы жан-жақты бақылауға алынған», – деді брифингте бөлімшенің бас инженері Әбілқасым Сарыұлы.
Келесі кезекте журналистерге көмірден кейін бидай мәселесі айтылды. Түркістан облысы бойынша бидай және ұн өнімдерін тасымалдаумен 35-тен аса мекеме айналысады. 2018 жылдың он айында Шымкент бөлімшесі бойынша 967 мың 050 тонна бидай тасымалданған. Бұл өткен жылдың сәйкес кезеңімен салыстырғанда 95,7% құрады. Жыл басынан бері 467 мың 908 тонна ұн артылса, оның ішінде 409 мың 68 тоннасы экспортқа жөнелтілген. Ал 58 мың 226 тоннасы ішкі нарыққа артылып отыр. Өткен жылдың нақ осы кезеңімен салыстырғанда 81% орындалды немесе 115 мың 839 тоннаға азайған.
Мұның себебін, бөлім мамандары ұн өнімінің көбінесе орталық Азия мемлекеттеріне экспортталатындықтан, Өзбекстан өздері ұн өндіруді қолған алғанымен түсіндірді. Сол себепті сұраныс жылдан-жылға төмендеуде екен.
Жалпы, Қазақстан темір жолы компаниясының вагондары жүк тасымалдауға толығымен жеткілікті. Жұмыс тобының мүшелеріне «Қазтеміртранс» АҚ меншіктік жабық вагондарын және де «Астық Транс» АҚ меншіктік астық тасымалдаушы құрамдарын қабылдауды және тапсыруды тәулік сайын бақылау белгіленді. Бұдан бөлек, тиеуге және түсіруге вагондарды уақытылы тазалап беруді қамтамасыз ету, станциялардың технологиялық жұмыс үдерісін сақтау және жергілікті жүкті тасу бойынша станциялардың жұмыстарына бақылау орнатылды.
Жансая СЫДЫҚБАЙ, Шымкент