Қозғалыс командирі
Жайлау Рысбеков – Арыс станциясының маневрлік диспетчері. Теміржол саласындағы еңбек өтілі – 35 жыл. Біз кейіпкеріміздің қауырт жұмыс үстінен түстік. Қолы босаған сәтте әңгімеге тартып, маневрлік диспетчер қызметінің қыр-сырымен таныстық.
– Біздің жұмысымыз таңғы сағат 8.30-да басталады. Алдымен жиналыс өтіп, онда жұмысшылардың міндеттеріне қатысты нұсқаулық беріліп, жоспар жасалады. Сосын түнгі ауысымда болған әріптесімнен жұмысты қабылдап аламын. Осы станцияда қанша электровоз бар, қанша құрама, қанша пойыз келеді, кетеді –барлығын қадағалап отырамыз. Әр айға берілген вагондар болады, бүгін паркте 33 электровоз қабылдадық. Депода 34 электровоз болды, қабылдап болған соң осы 34-тің екеуін шығысқа, екеуін оңтүстікке жібердік. Жұмыс істеп жатқан тепловоз, депо, ВЧД, ШЧ жұмыстарын бақылап отырамыз. Әр шаруашылықтың жауапты мамандары бар. Жолаушылар пойызын, вагон операторының да жұмыстарын қадағалаймыз. Қысқасы, 12 сағаттың ішінде қалай жұмыс істейтініміз кестеге бекітілген. Диспетчердің басты мақсаты – станцияның жұмысын ұйымдастыру, пойыздарды қабылдап алып, жөнелту. Дөңестен тасталатын вагондардың саны нормативке сай қанша болу керек, жұмыс барысы қалай, жоспарға сай атқарып отырамыз. Жүк тиеу, жүк түсіру, вагондар дөңестен түсірілуі, өңделуі, тағысын тағы жұмыстарды басқару – біздің міндетіміз. Мысалы, кемінде күніне 25 пойыз қабылданып, 25-27 пойыз жіберіліп отырады, кейде 30-дан асып кететін де кездер болады», – деді Жайлау Қайбылдашұлы өзінің күнделікті атқарып отырған жұмысын егжей-тегжейлі түсіндіріп.
Жайлау ағамыз темір жолда тер төгіп жатқан 35 жыл ішінде, теміржолшы кәсібін таңдағанына бір сәт те өкінбегенін айтады. «Әрине, әр жұмыстың өз қиындығы, жауапкершілігі бар. Бірақ, темір жолдың жөні бөлек қой. Мұнда бәрі тәртіпке түзілген. Сөйлесу реті де жазылып қойылған. Артық ауыз сөз жоқ. Темірдей тәртіп, жауапкершілік те жоғары. Жұмыстағы осы тәртіп пен жауапкершілік менің күнделікті өміріме де оң әсерін тигізді. Темір жол осынысымен ұнайды» деп сөзін түйіндейді қозғалыс «командирі».
Жансая СЫДЫҚБАЙ, Арыс–Шымкент
Суретті түсірген автор