Билік партиясының Қызылордадағы өкілдері мүмкіндігі шектеулі теміржолшыға қолдау көрсетпек
![](https://rail-news.kz/uploads/posts/2019/1/22/1548149390175.jpg)
«ҚТЖ» Ұлттық компаниясының салалық мекемелерінде теміржолшылардың әлеуметтік жағдайын арттыру мақсатында бірнеше жоба қолға алынып жүзеге асырылуда.
Қызылорда ЖТ бөлімшесінде де аталған әлеуметтік жобалар ойдағыдай іске асырылуда. Мәселен, дистанцияларда әйел затының денсаулыққа қауіпті жерлерде жұмыс жасауы азайтылып, оларға арнайы қосымша ақы төленіп, мүмкіндік болса ауыр жұмыстарды жасауына шектеу қойылған. Сонымен қатар денсаулығында кінәраты бар теміржолшылардың жұмыс жасауына мүмкіндіктер жасалып, оларға арнайы жеңілдіктер қарастырылған және де бұл жағдайлар үнемі назарда ұсталуда.
Қызылорда электрмен жабдықтау дистанциясы теміржолшыларының әлеуметтік тұрғыдан қолдау деңгейін бақылау үшін «Нұр Отан» партиясының «Теміржол» филиалы төрағасының бірінші орынбасары Базара Танбаева мекемеге арнайы келіп, кездесу өткізді.
Кездесуде еңбек адамының белсенділігін арттыру, оларды қоғамның мүшесі екендігін сезіндіру мақсатын ұстанған партия өкілі, әрбір қызметкердің жұмыс орнына барып, қызметтерімен танысып, жұмыс беруші тарапынан жұмыс жасауға жасалған ыңғайлы жағдайларын көріп, әлеуметтік қолдау білдірді.
– Қызылорда электрмен жабдықтау дистанциясында мүгедектігіне байланысты 4 қызметкер есепте тұр. Оларға мекеме басшылығы тарапынан ұдайы қолдау көрсетілуде. Партияның «Кедергісіз келешек» жобасы аясында денсаулығы сыр берген жандардың еңсесін тіктеп, өзгелер секілді жұмыс жасауға қолайлы жағдай жасаған басшыларға алғыс айтамыз, – деді «Теміржол» филиалы төрағасының бірінші орынбасары Базара Танбаева.
Кездесу барысында өздерінің кәсіби міндетін адал атқарып, абыройлы қызмет жасап, дистанцияның дамуына қосқан үлестері үшін 4 қызметкерге «Теміржол» партия филиалы төрағасының алғыс хаты табысталды.
Сабырхан СЕЙІЛБЕКҰЛЫ, Қызылорда
Суретті түсірген автор