Тоғыз жолдың торабы Аягөзде жүк жөнелтушілер қатары күрт артқан
Тоғыз жолдың торабы саналатын Аягөз станциясында жыл басталасымен қарбалас басталған. Себебі, жүк жөнелтушілер қатары күрт артқан. Қаңтар айынан бастап шалғай аудандардағы іргелі өндіріс ошақтары автокөлік тасымалынан теміржол қызметіне ауысып отыр.
Станцияда вагон айналымы артып, жөнелтілетін жүк көлемі ұлғаюына орай тауар кассасындағы жұмыс та қауырт және қыза түскен. Мұндай шаралар негізінен маусымдық сипатқа ие екені белгілі. Тек наурыз айынан бастап жүк жөнелтуге тапсырыс берушілер саны артатын-ды. Ал, биылғы жағдай өзгеше. Қазіргі күні Аягөз станциясының тауар кассасында күніне орта есеппен алғанда 80 құжат рәсімделіп жөнелтіледі. Қауырт жұмысқа орай теміржолшылар демалыс күндері де қызметке келуге мәжбүр. Ең ірі жүк жөнелтуші Аягөздегі «Алина» ЖШС тиелетін өнім көлемін арттырған. Сонымен қатар, ауылшаруашылығына маманданған алпауыт Үржар ауданының кәсіпкерлері тауарларын теміржолмен жөнелтуге шешім қабылдап жатыр. Оның негізгі бір себебі, Алматы-Өскемен республикалық тас жолының қар құрсауында қалып, жиі жабылатыны болып отыр.
Сондай-ақ, биылғы жылы іргелес Балқаш станциясынан «Қамқор вагон» ЖШС Аягөз филиалына жөндеуге келетін вагондар саны да артып отыр. Қаңтардың алғашқы жұлдызынан бастап 260 вагон техникалық жарақтандырылудан өтіп жөнелтілген екен. Бұл ретте аягөздік теміржолшылар тәулігіне 5-7 вагоннан жолға шығаруда. Жыл үлесіндегі жоспарларға сүйенсек, бұл көрсеткіштер алдағы айда өсе түседі деп күтілуде.
– Өткен жылы «Қамқор вагон» ЖШС Аягөз филиалына 2700-дің үстінде вагон кіргізіп, жөндеуден өткізіп жөнелтіппіз. Соңғы жиырма күннің есебіне қарасақ, былтырғы жылдың есепті мерзімімен салыстырғанда анағұрлым жоғары. Жалпы, станция бойынша жүк айналымы артып келеді. Мәселен, өткен жылы 3850 вагон жүктің тиелуіне, 1242 вагон тауардың түсірілуіне құжат рәсімдеппіз. Айына ең төменгі есеппен алғанда 500-дің үстіндегі жүктің құжаттары жасалынады, – дейді Аягөз станциясының тауар кассирі Азамат Ноғайбаев.
Ал, бұл жетістікке «Вагондармен жұмыс істеу – 2015» жүйесінде вагондарды беру және жинау, ЭПД модуль жүйесінде жөнелту және беру бойынша тасымалдау құжаттарын ресімдеу істері оңтайлылық беруде.
Сол тәрізді Аягөз станциясының бастығы Еркін Тойкеновтің айтуынша, станция бойынша осыдан екі жыл бұрын өндіріске енгізілген «Келісімді және коммерциялық жұмыс» автоматтандырылған басқару жүйесі жұмысты, жүкті жеткізу процесін анағұрлым жеңілдетіпті. Бұл елеулі өзгеріске жергілікті тапсырыс берушілер тарапы да жылдам қалыптасқан. Осыған дейін «Электронды үкімет» игілігіне арқа сүйеп үйренген аймақ кәсіпорындары ғаламтормен жұмыс жасауды толық меңгерген деуге болады. Нәтижесі сол, аягөздік теміржолшылар жылдың алғашқы айын жүк жөнелтушілердің қалың қатарымен бастап отыр.
Қуаныш Қожаев, Семей