Атырау магистральдық желі бөлімшесі былтыр 36 км қоршау салып, 54 шақырымын жөндеген
«Айта, айта Алтайды, Жамал апам қартайды» демекші, теміржолшылар үшін жырға айналған қауіпсіздік тақырыбының өзегі – теміржол бойында қараусыз жүрген мал мәселесі.
2018 жылы өңірде жүк және жолаушы пойыздарымен 8 жерде мал басылу оқиғасы тіркеліпті. Соған орай теміржолшылар жол жиектеріне малға қарсы қоршаулар салу ісін үдете түсті. Магистральдық желі бөлімшесі бойынша өткен жылы жаңадан 36,2 км қоршау салынып, 54,4 км бұрынғы қоршаулар жөнделген. Осы жұмыстарға 20 тонна тікенекті сым алынып, орнатылған. Сол секілді 550 км құрайтын Сағыз-Мақат-Атырау телімі аралығына мердігерлік әдіспен малға қарсы қоршау жұмысын жасау бойынша жобалық сметалық құжаттама дайындалыпты.
Өткен жылда 2687 мал иесіне темір жол аймағында мал бағу жөніндегі ескерту ережелері таныстырылып, 15 адамға тәртіп бұзушылық жөнінде хаттама толтырылған. Сондай-ақ, шұғыл тежеулердің, қараусыз малдың, ұрлық және бөгде адамдардың жолға шығуының алдын алу мақсатында жол дистанциялары мамандары тұрғындармен кездесіп, профилактикалық жұмыстар жүргізді. Осы бағытта станция-разьездерде 610 адаммен жиын өтіп, «Темір жол – қауіпті аймақ» тақырыбында 102 мектеп оқушыларымен түсіндірме жұмыстары, жол полициясы мамандарымен 43 рейд жүргізіліп, 3109 автокөлік жүргізушісімен өтпелерден өту тәртібі таныстырылған. Ал тұрғындар осыдан нәтиже шығаруы тиіс.
Қ.Мұқашев, Атырау