Ақтөбеде тазалық міндеттелді
Ақтөбе облысы бойынша меншікті тілші
Ақтөбеде жолаушылар тасымалы қызметіне қатысты он айда 38 рет тексеру жұмыстары жүргізілген. Тексеру қорытындысы бойынша қызмет көрсету мекемелеріне 31 айыппұл салынып, 15 ескерту қаулысы шығарылды.
Жолаушылар көлігіндегі объектілер мен жүктерді тасымалдау жағдайы санитарлық-эпидемиологиялық ережелер талабына сай болуға тиіс. Осыған орай санитар мамандардың тексерісімен жолаушылар тасымалы қызметіне қатысты бірнеше ескерту жасалды. Теміржол қызметінде вагондардың санитарлық талаптардың бұзылуына қатысты 4 материал сот органдарына берілген және 34 санитарлық ұйғарым берілді.
Бұл мәселе Ақтөбе бөлімшелік көліктегі тауарлар мен көрсетілетін қызметтердің сапасы және қауіпсіздігін бақылау басқармасының отырысында айтылды. Шараға теміржол және әуе көлігіндегі мекеме басшылары мен тазалыққа жауапты тұлғалар шақырылған. Жиында жолаушылар вагондарының жағдайы, қызмет көрсету түрін жүзеге асыру барысында санитарлық қорытындылардың болуы, пайдалану мерзіміне сәйкес жаңартылу мәселесі талқыланды.
«Қызмет көрсету сапасын жоғары деңгейге жеткізуге тиіспіз. Жолаушылар қызметінің әр өкілі тазалық тәртіптерінің сақталуына мүдделі болуға тиіс. Вагонда алмалы-салмалы жабдықтардың жеткілікті болуы және төсек-орын жабдықтарына қатысты мұқияттылық сақталуға тиіс. Вагондардың техникалық жөндеуден өтуі де уақытымен жасалуы керек. Жолаушыларға сапалы қызмет ұсыну үшін осы талаптарды қатаң бақылауда ұстауды сұраймыз. Төсек-орын жиынтықтары жыл сайын жаңартылып тұруға тиіс. Пайдалану мерзімі өткен тауарларды жарамсыз деп танып, есептен шығарылу керек», – дейді Ақтөбе бөлімшелік көліктегі тауарлар мен көрсетілетін қызметтердің сапасы және қауіпсіздігін бақылау басқармасының өкілі Асылгүл Шаранова.
Сонымен қатар, кездесуде жолаушылар қызметі халық көп тұтынатын және жиі шоғырланатын орын болғандықтан тұмау және жедел респираторлық вирустық инфекциялардың алдын алу, ауа алмасуды сақтау және жұмысшылардың уақытылы скрингтен өтуі ескертілді.