Теміржол күзет қызметіне сын жоқ
Шымкент қаласы бойынша меншікті тілшісі
Шымкент қаласындағы «Әскерилендірілген теміржол күзеті» АҚ филиалы өткен жылы 108 974 пойызға күзет қызметін көрсетіп, 3 584 877 вагон жүкті қорғаған.
Бірақ, пойыздар саны 2018 жылға қарағанда 8 пайызға азайып, вагондар саны да үш пайызға төмендеген. Шымкент ӘТЖК филиалы 1561 км қашықтыққа қызмет көрсетеді. Оның 1026 км Қызылорда аймағы, 535 км Шымкент өңірі алып жатыр. Филиал бойынша стационарлық бекеттер саны – 109,5 бірлік. Оның ішінде стационарлық объектілерді қорғау бойынша 31 постта қозғалыс, 70,5 бекетте инфрақұрылым нысаны, 8 бекетте аффилиирлендірілген кәсіпорын бар.
«Әскерилендірілген теміржол күзетінің өткен жылғы барлық қызмет көрсету түрлерінен түскен табысы 2 127 640 теңге, шығыны 22 428 145 теңгені құрады. Вагондарды қорғау сағаты 601697,58 құрады. Клиенттер тарапынан күзет қызметіне сын болған жоқ», – деді Шымкент «ӘТЖК» АҚ филиалының директоры Батыржан Жәнібеков.
Өткен жылы теміржол объектілеріне қарасты 19 мүліктің ұрланғаны мәлім болып, 31 адам ұсталды. 19 іс қозғалып, ұрланған мүліктердің құны 1 766 990 теңгені құрады. Филиалда бүгінде 1173 адам жұмыс істейді, оның 992сі күзетші. «Үздік күзетші» төсбелгісімен 59 жұмысшы марапатталған.