Теміржолшылар вакцина алу жұмыстарын жылдамдатуда

Қызылорда облысы бойынша эпидемиялық ахуал бұған дейін тұрақтанғандай көрінгенмен, аймақтың «қызыл зонадан» шығарылғанына да көп болған жоқ. Дегенмен теміржолшылар ауырмаудың бірден бір жолы – вакцина алу жұмыстарын жылдамдатуда. Дәрігерлік құзырлы органдардың мәліметінде өткен тәуліктегі жағдайда облыс тұрғындарынан 76 адамның ковид дертіне шалдығып, арнайы ем алып жатқаны айтылды. Демек, жағдай тұрақтанды дегенмен, қауіп сейілген жоқ, сондықтан індетке қарсы вакцина алу соңғы кезде жаппай науқанға ұласты. Бүгінгі күнге дейін жалпы Қызылорда ЖТ бөлімшесі теміржолшыларының 46 пайызы, Қызылорда магистральдық желі бөлімшесі еңбеккерлерінің 34,9 пайызы covid-19 пандемиясына қарсы вакцина салдырып үлгерді. Бұл жайында бөлімшенің кадр бөлімінің басшылары Жанар Ибрагимова мен Айдана Итемгеновалар мәлімдеді. Бөлімшедегі Қызылорда және Сексеуіл локомотив пайдалану депосы мен Қазалы вагон пайдалану деполарының теміржолшылары індетке қарсы вакцинаны тұрғылықты мекенжайы бойынша дәрігерлік мекемелерден алуда екен. Жалпы бөлімше бойынша, тіпті компания бойынша қызылордалықтар індетке қарсы егуде алдыңғы қатарда келе жатқаны байқалады. Бүгінгі күні бөлімшенің 52,5 пайызы, яғни жалпы штаттағы теміржолшылардың жартысынан астамы вакцинаның екі компонентін салдырып, ұжымдық иммунитет қалыптастырған. Арғын Орымбаев басқаратын Қазалы вагон пайдалану депосынан 355 адам, яғни 86,8 пайызы вакцина салдырған. Бөлімшенің станция мен бекеттерінде вакцина алуға ниет білдірген ұжымдарға барлық қолайлы жағдай жасалып отыр.