Теміржолшылардың еңбек қорғау жағдайларын жақсарту үшін бір мың теңге жұмсалған
Қызылорда облысы бойынша меншікті тілші
Қызылорда магистральдық желі бөлімшесіне қарасты Қызылорда жол дистанциясында еңбек қорғау мен техникалық қауіпсіздік шараларын қатаң сақтау бағытында кешенді жұмыстар жоспарланып, іске асырылуда. Дистанцияның еңбек қорғау және техникалық қауіпсіздік инженері Майра Бадрақова атқарылып жатқан жұмыстар ең алдымен теміржолшылардың қауіпсіздігін арттыруға бағытталғанын білдірді. Үстіміздегі жылы дистанция теміржолшыларының қажетті тұрмыстық және еңбек қорғау жағдайларын жақсарту үшін кешенді іс-шара жоспары бойынша 16915,0 теңге бөлінген болса, 5 ай ішінде 1066,0 теңге көлеміндегі қаражат мақсатты жұмсалған екен.
– Өткен жылы дистанция жұмысшылары жүз пайыз қажетті киім-кешекпен қамтамасыз етілді және де биылғы жылы да маусымдық киімдермен қамту жұмыстары атқарылуда. Еңбеккерлерді өндірістік жұмысқа қажетті киім-кешекпен, құрал-сайманмен қамтып, оларға қажетті жағдай жасау жыл сайын жүргізілетін шара болғандықтан биыл да бұл жұмыстар ретімен жүзеге асырылуда. Дистанция теміржолшылары үшін жыл басынан бері 21 түрлі маусымдық арнайы киімге тапсырыс беріліп, мерзімі бойынша тапсырыстың орындалуына тиісті барлық шаралар, яғни тапсырыс берілген заттарды жеткізіп беру, тапсыру-орындау құжаттары рәсімделгендіктен жақын арада жеткізіледі деп күтілуде. Жалпы дистанция теміржолшыларының еңбегі мен қауіпсіздігі қатаң бақылауда, – дейді дистанцияның еңбек қорғау және техникалық қауіпсіздік инженері Майра Бадрақова.
Жол дистанциясының телімдерінде, жұмысшыларға арналған жұмыс орындарында, қызметтік ғимараттарда 393 киім шешетін гардероб, жуынып-шайынатын 26 душ, 43 қолжуғыш, 42 киім кептіретін шкаф бар. Биылғы жылдың басынан бері дистанцияның өндірістік телімдерінде адамдардың пойызға басылу деректері орын алған жоқ. Дегенмен осындай келеңсіз жағдайларды болдырмас үшін дистанциялықтар жолға технологиялық талаптарға сай күтім жасап, темір жолға жақын орналасқан елді мекендердің тұрғындарымен, оқушыларымен түсіндіру жұмыстарын тұрақты жүргізіп келеді. Мәселен, олар жыл басынан бері 2581 адам қатыстырылған 89 жиын өткізген. 31 оқу орнында 4050 оқушыға теміржолдың аса қауіпті аймақ екені түсіндірілген. ЖІІб өкілдері мен ӘТЖ күзет сарбаздарымен бірігіп 46 рет рейд өткізілген. Темір жол бойындағы жаяу жүргіншілер өтетін өткелдер бойындағы 12 ескерту белгілері жаңартылған. Дистанцияда жолшылардың жұмыс орны талапқа сай болуы үшін белгіленген тәртіп бойынша аттестациядан өткізіліп тұрады. Биыл бекітілген жоспар бойынша 6 жұмыс орнын аттестациядан өткізу жоспарланып, әзірлік жұмыстары жасалуда. Бекітілген келісім бойынша осыған дейін денсаулыққа зиянды және ауыр жұмыс жасайтын дистанция жолшыларына сүт беріліп келсе, биылдан бастап сүттің орнына құрамында 15 түрлі витамин қоспасы бар кисель берілуде. Осы уақытқа дейін бұл шырынның 442 қорабы жолшыларға үлестірілген. Жолшылардың техникалық қауіпсіздік және еңбек қорғау талаптарын қатаң сақтауы үшін дистанция басшылығы мен еңбек қорғау инженерлері тарапынан үнемі инспекциялық тексеру, бақылау жұмыстары мен техникалық сабақтар тұрақты жүргізіледі. Орын алған тосын жағдайлар қайталанбау үшін кезектен тыс пысықтау сабақтары да ұйымдастырылады. Техникалық сабақ өткізудің кестесі қазіргі карантиндік талаптарға сай өткізіледі.