Маңғыстау теміржолшылары бақылауды реттейтін арнайы бөлім ашылуын сұрайды

Биылғы жылы Маңғыстау жүк тасымалы бөлімшесі Ақтөбеге қосалқы бөлімше ретінде қосылып, кейбір функциялары өзгергені белгілі. Диспетчерлер Ақтөбеге ауысып, оның жұмыстары орталықтан басқарылатын болды. Маңғыстау қосалқы бөлімшесі бастығының айтуынша, нәтижесінде жергілікті филиал кейбір мүмкін- діктерден айырылып, адымын тұсап отырған жайы бар. Әрине, бес бірдей бөлімшенің қозғалыс қызметін біріктіретін Ақтөбеде құрылған диспетчерлік орталықтың тиімділігі талассыз, үнем мен оңтайландыруда пайдасы шаш-етектен екенін жобаны жүзеге асырушылар дәлелдеп отыр. Дегенмен, «медальдің екі жағы бар» демекші, бұл жоба жергілікті бөлімшелерге кейбір функцияларды өз деңгейінде атқаруға мүмкіндік бермей отырғанын да айтуға тиспіз. – Бұрын дербес бөлімше кезінде жедел-өкімдік тарату бөлімі болатын. Пойыздар қозғалысын, яғни олардың учаскелерде жүрісін, тепловоздармен қамтамасыз етілуін, вагондар және жергілікті жүктердің айналымын, жүк түскеннен кейін вагонның кері кетуі, ай сайын берілетін техжоспармен тиелетін жүктерге бос вагондардың келуі, т.б. қадағалайтын пойыз диспетчерлері еді. Олар Ақтөбеге ауысқалы станциядағы жергілікті жүктердің айналымы, олардың уақытында берілуі, жөнелтілуі, бос вагондардың жүк тиеуге берілу уақыттары сияқты кейбір жұмыстарды қадағалайтын бөлім болмай қалды. АСУ-ды ЛОИС-ке қосты, тепловоз шаруашылығы бөлімін қысқартып, диспетчерлер кетті. Бізде тек жүк коммерциялық жұмыстар қалды. Осы жұмыстарды қадағалау ғана қалғандықтан қазір жергілікті станциялардағы жұмысты, сонымен қатар порттар, терминалдармен тікелей қарым-қатынасты бақылауға ала алмай қалдық. Соған байланысты «ҚТЖ» ҰК» АҚ Жүк тасымалы басшыларымен болған селекторлық жиында жағдайды түсіндіріп, ұсыныс бердік. Диспетчер болмаса да соның кейбір жұмыстарын уақытында қадағалау үшін арнайы бір бөлім ашылуын сұрап хат жаздық, – дейді бұл туралы Маңғыстау қосалқы бөлімшесінің директоры Нәжімеден Ғұбашов. Нәжімеден Бақтығалиұлының сөзіне сүйенсек, жоғарыда аталғандай, өңір теміржолындағы қозғалысты бақылай алмағандықтан теміржолда қандай да бір апатты жағдай немесе оқиғалар бола қалса, дер кезінде құқық қорғау органдарына ақпар беру үшін де қол қысқалық етеді.

«Егер ұсыныс мақұлданса, өңірдегі пойыздар қозғалысын бақылап отыруға мүмкіндік туар еді. Болған жағдайды бүгінде біз құқық қорғау органдарына бере алмаймыз, себебі оның қайда болып жатқанын көрмейміз. Көріп отырған учаскелік пойыз диспетчерлері Ақтөбеде. Диспетчерлік қызмет Маңғыстаудан көшірілгенде түбектен осы міндеттерді атқаратын 52 адам қысқартылып, оның 17-сі Ақтөбеге кетсе, 7 адам басқа жұмысқа орналастырылды. Олардың бәрі тәжірибелі диспетчерлер», – деген қосалқы бөлімше директоры ұсыныс оң шешімін табар деген сенімде.