Атыраулық теміржолшылар Батыста кең тараған дәстүр - Көрісу күнін атап өтті

Көрісу – Батыс өңірде кең таралған дәстүр. 14 наурызда жаңа ай туды, көктем келді деп есепетелінеді. Халық қыстан аман-есен шыққанына қуанып, бір-бірімен қол алысады. Биыл осындай мереке Атырау өлкесінде кеңірек атап өтілді, деп хабарлайды Rail-news.kz.

Демалыстан шыққан адамдар жұмыс аптасының алғашқы күнін көрісуден бастады. "Қазақстан Республикасының Президенті Қасым-Жомарт Тоқаев "Тәуелсіздік бәрінен қымбат" мақаласында Наурыз мейрамын тойлау тұжырымдамасын әзірлеп, көктем мерекесінің мазмұнын байытуды тапсырып еді. Ол 14 наурыздағы Көрісу күнінен бастау алады. Еліміздің Батыс өңірінде бұрыннан бар бұл дәстүр әлі күнге жалғасып келеді.  Атырау жүк тасымалы және магичстральды желі бөлімшесі кәсіподақ комитетімен бірлесе көрісу салтын ұйымдастырды.

Жұмыс аптасы басталар шақтағы таңғы 8-де дастархан жайылып, қымыз бен шұбат, бадана бауырсақ, сүзбе мен жент, т.б. тәттілер қойылды. Ұлттық киім киген қыз-жігіттер келушілерге дәм ұсынып, қызмет етті. Қызметкерлер, жан-жақтан желіден келген жұмысшылар бір-бірімен көрісіп, мәре-сәре болысты. Үлкендер жағы «Көрісу салты құтты болсын, жыл басымен», «Бакытты болыңдар!», «Өркенің өссін», «Жылдан жылға аман жетейік!» деп баталарын берді.

Желі бойындағы теміржолшылар да бұл мерекеден қалыс қалған емес. Аққыстау, Дина Нұрпейсова, Атырау, т.б. станциясының теміржолшылары жұмыста бәрі бір-бірімен қол алысып, төс қағыстырып көрісіп, мәре-сәре болысты. Жастар ән салып, терме айтып халықтың көңілін көтерді.