Астаналық пойыз құрастырушылар сайысқа түсті
«Қазақстан теміржолшысы» газетінің тілшісі
Наурыз мейрамы қарсаңында Нұр-Сұлтан станциясында «Станцияның ең үздік пойыз құрастырушысы» сайысы өтті. Оған Нұр-Сұлтан, Нұр-Сұлтан-Нұрлы жол және Қырқыншы станцияларынан 9 пойыз құрастырушы қатысып, кәсіби біліктерін сынға салды.
Әр станцияның үш пойыз құрастырушысынан құралған 3 топ алдымен өздерін таныстырып, одан әрі билет суырып, сондағы сұрақтарға жауап берді. Әр топтың таныстырылымы өзінше ерек болды. Білімі мен біліктілігі сарапқа салынған билет сұрақтарына да мүдірмеді. Екінші шарт бойынша берілген тапсырмаларды шешу, үшінші – логикалық сұрақтар жауабын беру және соңғысы – жылдамдыққа байланысты тапсырмаларды орындау сияқты сынақтардан өтті. Сайыстың әр кезеңі бойынша 1-5 аралығында балл қойылып отырды. Сайыскерлерге Нұр-Сұлтан станциясының кадр жөніндегі менеджері Рахия Мырзалиева, желілік ревизор Жанат Исаков және қауіпсіздік ревизоры Қайрат Бурлинов қазылық етті.
Қатысушыларға «Жолаушылар және пошта-жүк пойыздарына қандай вагондар қоюға тыйым салынады?», «Маневрлік жұмыстар қандай жылдамдықпен жүргізіледі?», «Маневрлік құрам дегеніміз не?», «Маневрлік жұмыстарды басқарушы маневр жұмыстары басталмас бұрын не істеуге міндетті?», «Белгі беру құралдары не үшін керек?» және т.б. кәсібіне байланысты сұрақтар қойылды.
Сайыс қорытындысында командалар бойынша 165 балл жинап, Нұр-Сұлтан-Нұрлы жол станциясының пойыз құрастырушылары бірінші орын алса, 161 балмен Нұр-Сұлтан станциясының пойыз құрастырушылары екінші орын алды. Ал соңғы орын алған Қырқыншы станциясының пойыз құрастырушылары 145 балл жинады. Ал жеке қатысушылар арасында 3-орынды Қырқыншы станциясының пойыз құрастырушысы Қанат Қарпаев, 2-орынды Нұр-Сұлтан-Нұрлы жол станциясының пойыз құрастырушысы Дәулетбек Базарбаев алса, Нұр-Сұлтан станциясынан қатысқан Нұрболат Әуесханов жүлделі бірінші орынды иемденді.