Атырауда соңғы 2 жылда тойланбай қалған наурыз мейрамы сән-салтанатымен өтті
Атырау облысы бойынша меншікті тілші
Ұлыстың ұлы күні Атырау локомотив пайдалану депосында мереке құрметіне спорттық ойындар ойналып, жеңімпаздар сыйлыққа кенелді.
Ұлттық киім киген теміржолшылар спорттық сайыстарды тамашалады. Жастар алтыбақан тепті. Ұлттық тағамдар – наурыз көже, бауырсақ, қуырдақ, құрт, ірімшік, қазы-қарта секілді тағамдардан дәм татып, әр бригада машинистері бір-бірімен көрісіп, «Ұлыс оң болсын, ақ мол болсын», «Жылдан аман, айдан есен», «Жаңа жыл құтты болсын» айтысып, мәре-сәре болысты.
Спорттық сайыс барысында арқан тартудан 1-орынды депо құрама командасы, ал 2-орынды локомотившілердің 3-бригадасы жеңіп алды. Кір тасын көтеруден 1-ші орынды Қайырлиев Райымбек, армрестлингтен Өтегенов Нұрлыбек жеңіп алды. Жеңімпаздарға сыйлықтар табыс етіліп, ардагерлер мен қадірменді қонақтармен қатар үздік ұлттық киім үлгілері де сый-сияпатсыз қалмады.