Жамбылда жалғыз теміржолшы соғыс ардагері қалды

Ұлы Отан соғысының ардагері Базарбай Бүрбаев туған жері Жамбылдан майданға аттанғанда он сегіз жасқа енді толған бозбала еді. Бұл 1942 жыл болатын. Жапониямен шекаралас Манчжурияда орналасқан миномет полкінің 393-ші әскери бөліміне түскен жас сарбаздың бес жылға созылған жауынгерлік өмірі осылай басталады.

Содан бері, міне, аттай 80 жыл өтіпті. Алла бұйыртса, қарт жауынгер 2022 жылдың 10 жел- тоқсанында 98 жасқа толмақ. Оның есімі Ұлы Отан соғысына қатысқан жамбылдық Отан қорғаушылардың құрметті жазбасы – «Ардагерлер» кітабына енгізілген. Онда миномет полкінің жауынгері Базарбай Бүрбаевтың Мукден іргесіндегі соғыста Харбин қаласын азат етуге, сондай-ақ, Хинган тау жотасында әскери іс-қимылдарға қатысқаны жазылған. Жас минометші маңызды да құпия операцияларға қатысып, жауынгерлік антына адалдықпен соғысқан. «Қызыл жұлдыз» орденімен, «Ерлігі мен қайсарлығы үшін», «Жапонияны жеңгені үшін» медальдарымен марапатталған. Кеңес жауынгерінің майдандағы жолы сол кездегі саяси жағдайларға байланысты Манчжурияда 1947 жылға дейін жалғасыпты. Қазақстанға оралған соң Жамбыл локомотив депосына жұмысқа орналасып, қырық жыл машинист болып жемісті еңбек етеді. «Еңбек ардагері» төсбелгісімен марапатталған абыройлы теміржолшы болды. Бүгінде Жамбылдағы жалғыз теміржолшы майдангер бес ұл, екі қызынан 11 немере, 4 шөбере көріп отыр. Ортаншы ұлы Қанаттың қамқорлығында отырған қария көзі көрмей, құлағы жөнді естімейтіні болмаса, ақыл-есі дұрыс, өздігінен жүріп-тұрады.

Базарбай атамыздың еліне, жеріне, Отанына тілейтін бір ғана тілегі бар. Ол – бейбітшілік. «Бүгінгі, ертеңгі ұрпақ соғысты көрмесін, зардабын сезбесін! Бейбіт өмірде елге, жерге қызмет етіп, тер төккеннен артық не бақыт бар?! Ұрпағымыз бақытты ғұмыр кешсін. Сонда мемлекет те өркендейді, халық та бақуатты күн кешеді», – дейді Манчжурия майданының қарт жауынгері.