Ардагерлерден тараған ұрпақ теміржолды атакәсіпке айналдырды
Маңғыстау облысы бойынша меншікті тілші
Теміржолшылар әулеті Алхабековтерді Маңғыстаудан ғана емес, Алматы және Қызылорда темір жолынан да кездестіруге болады. Әулеттің негізін қалаған Ұлы Отан соғысынан келген ағайынды жігіттер екен. Олардан тараған ұрпақ бүгінде қазақ темір жолының өн бойында ата кәсібін жалғастыруда.
Солардың бірі – тәуелсіздікпен түйдей құрдас маңғыстаулық машинист Нұрсұлтан Алхабеков кешегі Ұлы Отан соғысының ардагерлері, батыр аталарының есімін мақтан тұтады.
– Біздің теміржолшылар әулетінің негізін Алхабек бабамыздың екі ұлы Қашымбай мен Қаржаубай атам қалаған, екеуі де соғысқа қатысқан. Бірі депода слесарь, екіншісі бағыттаушы болып соғыстан кейін ұзақ жыл еңбек еткен. Қаржаубай атамыз 1941-1942 жылдары соғысқан, сосын аяғынан ауыр жараланып, елге қайтуға мәжбүр болады. Келгесін теміржолға жұмысқа кіреді. Қашымбай атамыз болса 1941-1946 жылдары соғыста болып, сосын қираған қалаларды қалпына келтірген. Елге оралғасын ол да теміржолшы болды. Екеуі де кеудесі наградаға толы батыр болған. Содан бері Алхабековтер әулетінен 15 шақты теміржолшы шығыппыз. Біз өз әулетімізді мақтан тұтамыз және сол батыр аталарымыздың атына кір келтірмей, олардың ісін абыроймен жалғастыруды өзімізге парыз санаймыз, – дейді маңғыстаулық машинист Нұрсұлтан Алхабеков.
Нұрсұлтан бүгінде Сай-Өтес станциясы мен Өзен аралығына қатынайтын машинист. Әкесі Марат Алхабеков болса Маңғыстау локомотив пайдалану депосы бастығының орынбасары.
Айтса айтқандай, Алхабековтар әулетінен кілең сайдың тасындай теміржолшы жігіттер шыққан екен. Жоғарыдағы ағайынды қос теміржолшыдан тараған ұрпақтан Ұлықпан Алхабеков станция бастығының орынбасары қызметінен зейнетке шығады. Темірхан Алхабеков желілік полицияда жұмыс істеген. Асанхан Алхабеков машинист, Үсенхан Алхабеков Алматы-Мәскеу пойызында жолсерік болды. Бүгінде бақилық болған Серік Алхабеков слесарь, немере буыннан – Аманқос Алхабеков Қазалыда тепловоз маманы, ТҚКП бастығы болды. Руслан Алхабеков Байқоңырда машинист көмекшісі. Тлектес Алхабеков Қазалы тепловоз жөндеу зауытында, Маңғыстау локомотив пайдалану депосында, бүгінде Алматы локомотив депосында еңбек етуде. Нұрлан Алхабеков Қазалыда машинист көмекшісі, Жасұлан Алхабеков Алматы локомотив депосында машинист. Осылай жалғаса береді...