Шу вокзалындағы сауда нүктелеріне қатысты ескерту берілді
Тараз қаласы бойынша меншікті тілші
Шу вокзалының басшылығы аудан әкімінің орынбасары Нұрлан Жақсыбаевпен вокзал перронындағы сауда нүктелерін аралап, профилактикалық шаралар өткізді.
– Вокзал ғимараты Жамбыл магистральдық желі бөлімшесіне қарайды. Перрондағы сауда нүктелері орналасқан жер – иесіз. Бірақ, «Сауда Сервис» ЖШС жергілікті әкімдікпен келісіп, кәсіпкерлерге жалға беріп отыр. Ең алдымен санитарлық нормаларды сақтау, өрт қауіпсіздігі сөз болды. Сонымен қатар, сауда нүктелерінің эстетикалық көрінісі сын болды.
Сыртқы қасбеті иқы-жиқы, біркелкі емес дүңгіршіктерді қалыпқа келтіру тапсырылды. Жолаушылар мен кәсіпкерлерге қызмет көрсетіп жүрген арба сүйреушілердің ескі-құсқы, сынған, қолдан жасалған құралдарын да жаңартып, ауыстыру туралы да ескертпе берілді. Алайда, серіктестік басшысы «бұл өзін-өзі ақтамайды» деген уәж айтуда. Дегенмен, жергілікті билік өкілдері кәсіпкерлерге жоғарыдағы кемшіліктерді түзеуге екі апта уақыт берді, – дейді Шу вокзалының бастығы Шолпан Арысбаева.