Мәжіліс депутаты семейлік теміржолшылармен кездесті
Абай облысы бойынша меншікті тілші
Жуырда «Respublica» партиясының тең төрағасы, Парламент мәжілісінің депутаты Руслан Берденов Семей теміржолында болып, келелі кездесу өткізді.
Жиынды ашқан бөлімше басшысы Алмас Сейсемқанов сөз кезегін мәртебелі мейманға ұсынды. Халық қалаулысы теміржолшылармен ашық диалог құруға дайын екенін білдіріп, елдегі саяси ахуал, теміржол сынды кәсіпорындар қызметінің проблемалық мәселелері мен жұмысшыларды толғандыратын әлеуметтік тақырыптарды көтерді. Ол көпшілік тарапынан қолдау тауып, кеңінен талқылауға ұласты. Сонымен қатар салалық қызметтегі маман тапшылығы және жеңілдікпен тұрғын үй сатып алу мақсатындағы мемлекеттік бағдарламаларға қолжетімділіктің жоқтығы сынды бірқатар өзекті мәселелер айтылды. Теміржолшылар қауымының әлеуметтік статусы, ел үкіметі тарапынан көмек пен қолдау көрсету сияқты өткір тақырыптар да көтерілді.
Сондай-ақ жекеменшіктің қолына өткен, бүгінде пайдаланылмайтын, қараусыз қалған кірмежолдардың жағдайы да тілге тиек болды. Мұнымен қатар бөлімше басшыларының бірқатар ұсыныстарына пікір білдірген Руслан Арысбекұлы Парламент қабырғасындағы тиісті заңнамалық жобалар туралы да айтып өтті.
Тікелей байланыс форматында өткен кездесуде теміржолшылар тарапынан Парламенттегі партия фракциясының алдағы уақыттағы жұмыстарына негіз болатын көптеген ұсыныстар да айтылды.