Медпойыз Абай елін аралады

Жуырда байтақ елімізді аралап жүрген «Саламатты Қазақстан» пойызы Абай облысындағы сапарын тәмамдады.Тамыздың 24 күні басталған әлеуметтік пойыздың жұмысы Семей ЖТ бөлімшесіндегі он шақты станцияға аялдап, алыс жақын елді мекен тұрғындарына қызмет көрсетті.

Ақжолтай пойыз Шығыс Қазақстан мен Абай облысының шалғай ауылдары мен станциялар тұрғындарына биыл да зор жәрдем көрсетті. Облыстағы сапарын Дегелең станциясынан бастап, екі күн бойы жұмыс жүргізген пойыз әрі қарай Ауыл, Белағаш, Алтай, Бұқтырма, Күмістау, Таусамалы сынды елдімекен халқын қуантты.  Өткен апта облыс орталығынан жырақта жатқан Жарма, Үшбиік және Таңсық станцияларында да аялдады.  

Емхана-пойыздың қабылдау уақыты бір сағат түскі үзіліспен сағат 09:00-18:00 аралығында жүргізілді. Азаматтар үшін өздерімен бірге жеке куәлігі болса жеткілікті. Дәрігерлер әсіресе Үшбиік станциясында келушілер саны мол болғанын айтады. Жергілікті тұрғындар терапевт, хирург, педиатр, психолог, кардиолог, стоматолог және басқа да 40-тан астам маманның тегін медициналық қызметіне жүгінген.  

Сол тәрізді бұл әлеуметтік жоба денсаулықты нығайтуды ғана емес, құқықтық және психологиялық қолдауды да қамтиды. Пойыз құрамындағы құқықтық және медиативтік қолдау көрсететін заңгерлер мен медиаторлардың да қызметін пайдаланушылар қатары көп болған. Жалпы, ауылдағы халықтың өмір сүру сапасын арттыруды көздейтін жоба аясында әлеуметтік аз қамтылған отбасыларға ерекше көңіл бөлінуде. Мәселен, көп балалы аналар, мүгедек және ауыр дертке шалдыққан балалары бар әйелдер мен мүгедектерге заң тұрғысынан да көмек берілді. Мысалы, Үшбиік станциясының бір тұрғыны медициналық пойыздың заңгерлеріне сот пен арадағы дау жөнінде кеңес сұрап келіпті. Оған тиісті кеңес беріліп, заңдық тұрғыда жәрдем жасалған.    

Абай еліндегі жұмысын сәтті аяқтаған пойыз  Қарағанды өңіріне жол тартты.