Жаңа жылға тарту
Маңғыстау облысы бойынша меншікті тілші
Жаңа жыл қарсаңында шалғайдағы Болашақ станциясында балаларға керемет сыйлық тарту етілді. Ауылдан шағын спорт кешені пайдалануға берілді.
Әдеттегідей Аяз ата емес, мұндай мүмкіндікті ауыл басшылығы сыйлады. Ауыл әкімінің тұрғындармен дәстүрлі есеп беру кездесуінде жұртшылық тарапынан осындай мәселе көтерілген болатын. Соған сәйкес әкімдік теңгеріміндегі ғимаратқа ағымдағы жөндеу жұмыстары жүргізіліп, игілікке беріліп отыр.
Аталған ғимарат үлкен зал, ерлер-қыздар бөлмесі, жаттықтырушы бөлмесі және жуыну бөлмелерінен тұрады. Орталықтандырылған жылу жүйесіне қосылған.
– Қазіргі таңда ғимаратқа күрес үйірмесін ашуға 6×6 көлемінде матрас төселіп, ҚТЖ мекемесі тарапынан теннис үстелі, жаттығу құралдары орнатылды. Келер жаңа жылда әкімдік спорт кешеннің материалдық техникалық базасын толықтыру бағытында жаттығу құралдарын алуды жоспарлап отыр. Сонымен қатар аудандық спорт мектебі тарапынан жаттықтырушы жұмысқа алынып, күрес үйірмесіне балаларды қабылдау жүргізіледі, – деп хабарлайды бұл туралы Болашақ ауылдық округінің әкімдігі.
Орайы келгенде айта кетсек, станция тұрғындарының салауатты өмір салтын сақтау бағытында тағы бір игілікті іс атқарылып, футбол алаңына ағымдағы жөндеу жұмыстары жүргізілген. Нәтижесінде газон жабындысы, жарық шамдарының тоқ желісі қайта жүргізіліп, қоршауы қапталып, орындықтар орнатылған.