Медпойыз Ақтөбенің 9 ауылына қызмет көрсетеді
Ақтөбе облысы бойынша меншікті тілші
Тегін медициналық және құқықтық көмек көрсететін медициналық пойызы Ақтөбе облысының 9 ауылы мен оған жақын орналасқан елді мекен тұрғындарын қабылдайды.
«Саламатты Қазақстан» медициналық пойызы 21 маусымнан бастап Ақтөбе облысының территориясына келді. Бірінші күні Байғанин ауданының Ноғайты ауылында жұмысын бастады. Ауыл тұрғындарына тегін медициналық және құқықтық көмек көрсетілетіні туралы хабарландыру болды. Өңірде болған уақытта әрі қарай Шұбарқұдық, Қарашоқат, Қотыртас, Қандыағаш, Мәртөк, Ақкемер, Кемпірсай станцияларына аялдайды.
Жылжымалы медициналық аппараттармен жабдықталған вагонда 29 дәрігер бар. Олар ауыл тұрғындарын хирургия, педиатрия, кардиология, неврология, оториноларингология, офтальмология, стоматология, гинекология, урология, функционалды диагностика, рентген және психология салалары бойынша қабылдайды.
Кеңес беруден бөлек, пойызда УДЗ, ЭКГ, флюорография, гастрофиброскопия, қан талдауы және басқа да диагностикалық тексерулерден өтуге болады. Қажет болған жағдайда шағын хирургиялық операциялар жасалады. Барлық санитарлық және техникалық талаптар сақталған, пойыз заманауи жабдықтармен қамтылған.
Дәрігерлермен қатар, ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссия атынан келген заңгерлер мен медиаторлар ауыл тұрғындарын қабылдайды. Олар еңбек дауларын шешуге, әлеуметтік төлемдерді рәсімдеуге, сот және құқықтық мәселелер бойынша кеңес беруге көмектеседі.
Медициналық пойыз Шұбарқұдықта 21-22 маусым күндері, Қарашоқатта — 23 маусым, Қотыртаста — 24 маусым, Қандыағашта — 25-26 маусым күндері қабылдау жүргізеді.
Ал Ақтөбе өңірінің Мәртөк, Ақкемер және Кемпірсай ауылдарына пойыз шілде айында келеді деп күтіледі. Мәртөк тұрғындары — 13-14 шілде күндері, Ақкемер — 15-17 шілде, Кемпірсай — 17-18 шілде мамандардың кеңесіне жүгіне алады.
Ақтөбе облысындағы жұмысы аяқталған соң, пойыз БҚО, Қостанай өңірлеріне бағыт алады.