Теміржолшы әулеті «Дарынды отбасы» номинациясын жеңіп алды

Астанада өткен «Мерейлі отбасы» ұлттық байқауының қалалық кезеңінде үздік деп танылған 19 отбасының ішінде теміржолшылар жанұясы да бар. Биыл 11-ші рет өткен байқауда Жұмашевтар «Дарынды отбасы» номинациясын жеңіп алды.

Байқауға барлығы 255 өтінім келіп түскен. Әр отбасы өзінің тарихын, дәстүрлері мен жеткен жетістіктерін және құндылықтарын баяндаған. Ләззат Жұмашева ҚТЖ компаниясының еншілес ұйымы «Қазтеміртранс» АҚ-ның кірістерді бақылау департаментінің директоры болып еңбек етеді. Теміржолда 20 жылдан бері жұмыс істейді. Жолдасы екеуі бес бала тәрбиелеп отырған көп балалы жанұя.  

«Біз бұл байқауға қатыса отырып, өзіміз секілді түрлі отбасылармен танысып араластық, отбасы құндылықтарын сараладық. Біз мысалы отбасымызда жеті адам болсақ, бұл жеті түрлі мінез бен тағдыр иесі бар деген сөз, бірақ бізді бір шаңырақ астында ортақ арман мен мақсат, өмірлік құндылықтар біріктіреді, – дейді Ләззат Жұмашева.  

Осыдан 18 жыл бұрын шаңырақ көтерген Ләззат пен Арнұр Жұмашевтар – береке мен бірліктің, татулықтың үлгісін көрсетіп отырған жарасымды жанұя. Ләззат – экономист-инженер, маркетинг, көлік және білім саласында гранттар иегері, SBS швейцариялық мектебінің МВА түлегі, сонымен қатар республикалық ғылыми байқаулардың жүлдегері, «Алтын белгі» иегері. Жұбайы – заңгер, 10 жыл мемлекеттік органдарда еңбек еткен, қазір жеке кәсіпкер. Ақсұлтан, Алдияр, Амина, Амира және Алимхан атты ұл-қыздарды тәрбиелеп отыр. Балалары шетінен білімді де өнерлі, театр өнерін меңгеріп, түрлі байқаулар мен концерттерге қатысып, жүлделі орындар алып жүр. Волонтер ретінде қоғамдық істермен айналысады.  

Үлгілі отбасында салт-дәстүр берік сақталып, ресми мерекелер аталып өтеді. Ләззаттың айтуынша, жұбайы балаларының патриоттық тәрбиесіне ерекше мән береді. Соңғы үш жылда бақша егіп, балаларын жерді күтіп, баптауға баулып жүр екен. Биыл Жұмашевтар әулеті алғашқы отбасылық тимбилдинг өткізуді жоспарлап отырған көрінеді. Дарынды отбасыға сәттілік дейміз.