Теміржолшылар экологиялық акцияға қатысты
Түркістан облысы бойынша меншікті тілші
Еліміздің теміржолшылары «Таза Қазақстан» республикалық бағдарламасын белсенді қолдап, жалпы қалалық сенбіліктерге қатысуда.
Мәселен, өткен сенбіде Арыс локомотив пайдалану депосының 40-тан астам қызметкері жергілікті әкімдік ұйытқы болған жүздеген мекеме мен мыңдаған жұмысшы жұмылдырылған жалпықалалық сенбілікке қатысты. Олар өзара ұйымшылдықпен төңіректің тазалығын қадағалап, жол жиегінде шашылған күл-қоқысты жинап, бейберекет өскен жантақ, тікендерді шапты.
– Біз өндірістік цехтардың маңы мен қызметтік өткелдің төңірегін, темір жол жиектеріндегі қоқысты жинап, тазалығын қамтамасыз еттік. Осылайша, жұмыс орнымыз бен қаламыздың көркейе түсуіне өз үлесімізді қостық. Алдағы уақытта да мұндай жұмыстар жалғасын табатын болады, – дейді Арыс локомотив пайдалану депосының инженер-экологы Арман Дастанов.
Айта кетейік, ел президенті көтерген бастамаға «ҚТЖ» ҰК» АҚ өңірлердегі филиалдар мен бөлімше ұжымдары біркісідей атсалысып, қоғамдық жұмыстарға жұдырықтай жұмылып кірісуде. Бүгінге дейін осы мақсатта ҚТЖ бойынша акцияны қолдап 1274 сенбілік өткен екен.