Соғыс және тыл ардагерлеріне құрмет
«Қазақстан теміржолшысы» газетінің тілшісі
Алматы жүк тасымалы бөлімшесінің бір топ еріктілері «Самұрық-Қазына» ұлттық әл-ауқат қоры компаниялар тобының жыл сайын өткізетін «Жеңіске – 75 қадам» әлеуметтік қайырымдылық жобасына үн қосты.
Алматылық ерікті теміржолшылар жастар бір аптада әрбір ауыл-ауданды аралап, Ұлы Отан соғысы және тыл ардагерлеріне құрмет көрсетумен қатар, материалдық көмек көрсетті. Олар өз күштерімен дайындаған азық-түлік пен керек-жарақты 40 ардагердің үйіне апарып берді.
Бөлімшенің қозғалыс қауіпсіздігі қызметінің вагон шаруашылығы жөніндегі ревизоры Диас Байғонысовтың айтуынша, бұл қайырымдылық көмекті атқаруға жалпы бөлімше бойынша 19 ерікті теміржолшылар жұмылдырылған. Олардың қатарында Алматы-1 станциясының орталықтандыру жүйесінің операторлары, вагондар жылдамдығын реттеушілер, Алматы локомотив пайдалану депосының, бөлімшенің шұғыл басқару және есеп бөлімінің, қозғалыс қауіпсіздігі қызметінің мамандары бар.
– Еріктілердің көбі жастар деуге болады. Қазіргі төтенше жағдай кезінде біз – жастар алғы шетпе жүрмегенде кім жүреді?! Әрине сақтық шараларын ұмытқан жоқпыз. Ардагерлердің үйіне баратын еріктілердің қауіпсіздіктерін толық қамтамасыз еткесін ғана жолға шықтық. Бүгінде жастары жүзге жеткен соғыс және тыл ардагерлерінің хал-жағдайын сұрап, мұң-мұқтаждарына құлақ астық. Олар көрсетілген көмекке алғыстарын жаудырып, батасын беруде, - дейді Д. Байғонысов.
Ерікті жастар амандаса барған тыл ардагерлерінің бірі Атыбай Сұлтанқожаева 111 жаста екен. Өзі көп балалы Батыр ана. Тағы бірі - соғыс ардагері Виктор Кашкаров. Әрине, бүгінгі бейбіт заман үшін жан аямай күрескен ардагерлер тек Жеңіс күні емес, әр күні құрметке лайық. Сол сый-құрметті көрсетуге мүмкіндік беретін «Жеңіске – 75 қадам» жобасы ардагерлерге жыл бойы қамқорлық жасауды көздейді.