Желмен жарысқан жас теміржолшы Жалғас

Жүгіргенде желдей есіп, жай адамды шаң қаптырып кететін желаяқтар жарысында топ жарған атыраулық жас теміржолшы Жалғас 5-6 қыркүйек күндері елордада 5 шақырымға жүгіруден халықаралық онлайн жарысқа қатысып, жүлде алды.

ҚР Ұлттық Олимпиадалық комитеті, Жеңіл атлетика федерациясы және «Қазақстан темір жолы» ұлттық компаниясы аталған жарыстың Бас серіктестері болған еді. Жарысқа Ресей, Латвия, Италия, Швеция, Беларусь мемлекеттерінен және Қазақстаннан 600-ден астам кәсіби жүйріктер қатысты. Атыраулық Жалғас Мугамиллин ҚР Жеңіл атлетика федерациясының жүлдесін иеленіп қайтты. Соған орай ол ҚР Ұлттық Олимпиадалық комитетінің арнайы сыйлығымен марапатталып, Мәскеу қаласына тапсырыс беру арқылы алынған спорт костюмі, спорттық жейделер мен аяқ киім, рюкзак сыйға берілді. Осы сыйлықты Атырау магистральдық желі бөлімшесі бастығының бірінші орынбасары Жәнібек Жөнтұрбаев бөлімше ұжымы алдында табыс етіп, марапат иесіне спортта да, еңбекте де толайым табыс тіледі. 

Бөлімшенің персоналды басқару бөлімінің бастығы Анар Жалғасбаеваның айтуынша, Жалғас 1988 жылы Исатай ауданы, Нарын бекетінде туған. Өзі теміржолшы отбасынан – әкесі Сабырғали өмір бойына жол шебері болып жасаған, қазір зейнеткерлікте. Жалғас та әке жолын жалғастырып, 2015 жылдан бері Атырау жол дистанциясына қарасты Нарын бекетінде жол монтері. Жалғас мектеп кезінен-ақ спортты серік қылып, жүгірумен айналысады екен. 

– Ауылымызда бел-белес, төбе көп. Мектептен шыға сала «анау төбеге дейін кім бірінші барады» деп балалар жарысатынбыз. Содан бері жүгіруді өзіме серік қылдым және денсаулыққа да пайдасы зор. Әуелі мектепте, кейін ауылдық, аудандық, облыстық жарыстарға қатысып, республикалық, халықаралық сайыстарға да жол ашылды. Сөйтіп бұл менің екінші мамандығыма айналды. Биылғы онлайн жарыста да ауылда болып, 5 шақырымды 19 минутта еңсердім, – дейді ол. 

Ал бөлімшенің спорт секторы жетекшісі Ринат Иманғазиевтің айтуынша, Жалғас Мугамиллиннің спорттағы болашағы зор. Былтыр қыркүйек айының соңында елордада «ҚТЖ марафон – өзгерістерге бастар жақсылық. Бірінші болып қатыс!» атты теміржолшылар арасында алғашқы марафон жарысы өткен болатын. Оған 350 шақты адам қатысып, жас шамасына қарай бөлініп, 2,5,10,21, шақырымға жүгіру сайысы ұйымдастырылған. Осы марафонда 5 шақырымдық жарысқа 30-39 жас аралығында қатысқан Атырау жол дистанциясының жол монтері Жалғас Мугамиллин басқалардан қара үзіп, бірінші болып келіпті. Биыл да, міне, мерейі үстем болды. Бәлкім, ол атақты желаяқ рекордшымыз Марат Жыланбаев сияқты әлемге танылар. Сәтті жол саған, Жалғас!