Күш атасын танымас

Тараз көліктегі оқу орталығы курсанттарының арасында спорттық шара ұйымдастырылды. Олар арқан тарту мен кір тасын көтеруден күш сынасты.

Қара күшке келгенде қазақ жігіттеріне тең келетін кім бар?! Кір тасын көтеруде де суырылып алға шыққан Қажымұқанның ұрпақтары аянып қалмады. Атап айтқанда, бірінші орын алған №91 топ курсанты Жастілек Әбдіқұловтың, екінші орынды иемденген №58 топ курсанты Тұрарбек Оспановтың, үшінші орыннан көрінген №52 топ курсанты Нұрғали Асановтың қайратына сүйсініп, қол соқпаған жан қалмады.  

Сондай-ақ, арқан тартуда да топ курстанттарының белсенділігі жоғары болып, білек күшіне сенген №91 топ (жол дистанциясының жұмысшылары) жігіттері бірінші орын алды. Ал №58 топ (тепловоз машинистері) екінші, №52 топ (электровоз машинистері) үшінші орынды иеленді.  

Мерекеге орай Жамбыл ЖТ бөлімшесінің спорт нұсқаушылары ұйымдастырған дода жеңімпаздары бағалы және қаржылай сыйлықтарға ие болды.