Теміржолшылар арасында шағын футболдан жарыс өтті
Атырау облысы бойынша меншікті тілші
Тәуелсіздік күніне орай Ақжайық белгі беру және байланыс дистанциясының цехтары арасында теміржолшылардың жақсы көретін спорт түрінің бірі – шағын футболдан жарыс өтті.
Дистанция кәсіподағының ұйымдастыруымен өткен спорттық шараға дистанцияішілік цехтардан 5 команда қатысты. Олар: шеберхана цехы, СЦБ 2, ЛАЗ, КИП СЦБ және АУР командалары. Бір мекемеде еңбек ететін жігіттер бірнеше топқа бөлініп, өзара жарыс көрігін қыздырып, жақсы ойын көрсетті. Әр цех ойыншылары намысты қолдан бермеуге тырысып-ақ бақты. Оның үстіне әлем чемпионатын көріп рухтанған жігіттер дәл пастар беріп, әдемі голдар соғып жатты. Бес топқа бөлінсе де бір ұжым емес пе, ойын алаңында қарсылас болса да бір жағадан бас шығарып, жарысты өте ұйымшылдықпен өткізді. Соңғы ойында бірінші орынды шеберхана цехы командасы иемденетіні белгілі болды. Екінші орынға таласқан СЦБ 2 командасы мен ЛАЗ командасының ойынында бірінші команданың бағы жанды. Ал лаздықтар үшінші орынды қанағат тұтты. Десе де, бөле-жармай «достық жеңді» деп тарасқан командалар кәсіподақ атынан сый-сияпатқа ие болды. Жеңімпаз командалар арнайы диплом және ақшалай сыйлықпен марапатталды.