Машинистер жарады
Тараз қаласы бойынша меншікті тілші
Тоғыз жолдың торабындағы Шу станциясында орналасқан теміржол мекемелері арасында волейболдан өткен жарыста машинистер командасы жеңіске жетті.
Жамбыл теміржолшылар кәсіподағының бекіткен календарлық жоспарына сәйкес ұйымдастырылған спорттық шараға 6 команда қатысты. Осы команданың бәрінен шеберлігі артық шығып, айқын басымдылықпен бірінші орынға шыққан Шу локомотив пайдалану депосының машинистері бұрыннан-ақ бәйгенің алдын бермейтін мықты ойыншылар болатын. Сондықтан олардың жеңісі бірауыздан мойындалып, жанкүйерлер қуана қол соғып, қошемет білдірді. Сондай-ақ Шу белгі беру және байланыс дистанциясы екінші орынға шықса, Әскерилендірілген теміржол күзетінің жігіттері үшінші орыннан көрінді. Жеңімпаз командалар мен үздік ойыншылар кәсіподақ тарапынан дайындалған бағалы сыйлықтармен марапатталды.