Атырауда спартакиада өтті
Атырау облысы бойынша меншікті тілші
Атырау электрмен жабдықтау дистанциясында (ЭЧ-4) аудандық электр тораптары арасында спорттың бірнеше түрінен, атап айтқанда дойбы, кір тасын көтеру, қол күресі, дартс ойыны және арқан тартудан спартакиада өтті.
Спорттық шараға Сағыз, Мақат, Опорный, Құлсары, Ганюшкино, Аққыстау, Атырау тораптары мен басқару аппараты ұжымы және еңбек ардагерлері де қатысты. Әрине, спорттық дода болған жерде қай ойын түрінің де тартыс-таласпен өтетіні айқын. Дегенмен, күштілер мен ептілер мұнда да іріктеліп шықты. Арқан тартудан Ганюшкино аудандық электр торабы командасының жігіттері басым түсіп, 1-орынды жеңіп алса, Сағыз бен Атырау командалары 2, 3-орынды иеленді.
Қол күресінен аққыстаулық А.Аленов 1-орынды иемденді. Ал кір тасын көтеруде сағыздық Н.Нұрбаевтың күші басым түссе, дартстан Р.Сахипов мергендігін танытып, 1-орын алды. Дойбыдан Ганюшкино АЭТ аға механигі Н.Хамитов ой жүйріктігімен бас жүлдеге ие болса, Опорный электромеханигі Н.Бөрібаев 2-орынды місе тұтты.
«Спартакиада өткізудегі мақсат – әр ауданда қызмет ететін, бастары көп қосыла бермейтін жұмысшыларымызды жинап, салауатты өмір салтын насихаттау арқылы ұжымның бірлігін нығайту», – дейді мекеме басшысы Берік Досжанов.
Жеңімпаздар арнайы диплом және сыйлықтармен марапатталды.
