Жамбылдық теміржолшылар арасында бильярдтан жарыс өтті
Тараз қаласы бойынша меншікті тілші
Тараз қаласындағы «Бай Сұлу» бильярд клубында жамбылдық теміржолшылар арасында бильярдтан жарыс өтті.
Кәсіподақ төрағасының кубогына арналған іріктеу біріншілігіне 13 тастаяқ шебері қатысып, бақ сынасты. «Бақ шаба ма, бап шаба ма» демекші, тастаяқ шеберлерінің бір-бірінен өнерін асыруға тырысқан өрнекті ойыны нәтижесінде Жамбыл локомотив пайдалану депосының машинисі Әділхан Асқарбай қарсыластарын ойсырата ұтып, жүлделі бірінші орынды иемденді. Ал Жамбыл белгі беру және байланыс дистанциясының Тараз станциясы бойынша сигналисі Нұрболат Сейілбек екінші орынды иеленді. Жеңімпаздар кәсіподақ тарапынан марапатталды.
– Жалпы кәсіподақ тарапынан жиі ұйымдастырылатын спорттық шаралар аймақ теміржолшыларын түгел спортпен достастырды десек, артық айтпаймыз. Бұл олардың өзара ынтымағын арттырып, белсенді өмірге бейімдейтіні анық, – дейді Жамбыл бөлімшесі кәсіподақ ұйымының сарапшысы Серік Наурызбаев.