Атырауда бильярдтан турнир өтті
Атырау облысы бойынша меншікті тілші
Жуырда Атырау қаласындағы «Бомонд» бильярд клубында өлке теміржолшылары арасында Салалық кәсіподақ төрағасы жүлдесі үшін турнир өтті.
Турнирді салалық кәсіподақтың Атырау аймағы бойынша өкілдігі «Локомотив» ФСК спорт нұсқаушыларымен бірлесе ұйымдастырды. Оған Атырау жүк тасымалы және магистральдық желі бөлімшелерінен сегіз команда қатысты. Атап айтқанда Атырау және Мақат локомотив пайдалану деполары, Теңдік, Ақжайық станциялары, Атырау және Құлсары жол дистанциялары, Атырау және Ақжайық белгі беру дистанцияларының командалары тастаяқ шарын көздеуден шеберліктерін сынға салып, барын салды. Қол жүріп кетсе, допша домалап, ал кейде қанша тырыссаң да ырыққа көнбей кететін бұл ойынның сондай өзіндік ерекшелігі де бар. Мүлт кетсең, бағың тайып, барыңнан айрыласың. Шарды шарға ұрып дөп тигізсең, ұпайың көбейеді. Сондықтан да ойыншылардың шеберлігі сыналған бұл күні қапы кеткен де, нысанаға дәл атқан да сәттер болды.
Ойын қорытындысы бойынша жүлделі 3-орынды Атырау локомотив пайдалану депосы тепловоз машинисінің көмекшісі Талғат Мұқашев, 2-орынды НЖС-13 бөлімшесіне қарасты вокзал шаруашылығы бөлімінің бастығы Айбек Қуанышев, ал бірінші орынды Мақат локомотив пайдалану депосы тепловоз машинисінің көмекшісі Райымбек Есениязов жеңіп алды. Жеңімпаздар грамоталармен және ақшалай сыйлықпен, ал барлық қатысушылар ынталандыру сыйлықтармен марапатталды. Атырау жүк тасымалы кәсіподақ ұйымының спорт нұсқаушысы Ринат Иманғазиевтің айтуынша, өңірде өткен турнирде жеңімпаз атанған тастаяқ ойынының шебері Р.Есениязов бильярдтан Павлодар қаласында өтетін финалдық жарыста Атырау өңірінің намысын қорғайды.
