Түркістанда Қазақстан темір жолының 120 жылдығына орай спартакиада өтті
Түркістан облысы бойынша меншікті тілші
Түркістанда Қазақстан темір жолының 120 жылдығына орай «Қазкөліккәсіп» Шымкент магистральдық желісінің кәсіподақ ұйымының ұйымдастыруымен теміржолшылар арасында шағын футбол, үстел теннисі және шахматтан спартакиада өтті.
Жарысқа оңтүстік өлкедегі теміржол мекемелерінен 80 спортшы қатысты. Жеребе арқылы қарсыласы анықталған шахмат ойынында Түркістан станциясының қызметкері Бауыржан Ахымбеков ой озығымен дараланып, жеңімпаз атанды. Ал екінші және үшінші орындарды Түркістан локомотив пайдалану депосының қызметкері Нұрлан Әбдікәрімов пен Әскерилендірілген теміржол күзеті мекемесінің маманы Сералы Жаңабеков өзара бөлісті. Үстел тенисінен өткен бәсекеде ТЧЭ-33 мекемесінің машинист көмекшісі Бейбіт Керімбековтің ептілігі мен шапшаңдығы үйлесім тауып, қарсыластарынан үстем шығып, жеңімпаз деп танылды. Екінші орынды осы мекеменің машинисі Нұржан Дәулетбеков қанжығасына байласа, 3-ші орынды Вокзал шаруашылығы мекемесінің вокзал кезекшісі Қалдыбай Шотаев еншіледі.
«Қазкөліккәсіп» Шымкент магистральдық желісінің кәсіподақ ұйымының спорт-нұсқаушысы Көмек Асанов төрешілік еткен кіші футболдан командалық жарыста ТЧЭ-33 мекемесінің жігіттері бірінші орынды жеңіп алды. Түркістан станциясының ұжымы екінші орын мінберінен табылса, Әскерилендірілген темір жол күзетінің командасы 3-орынды қанағат тұтты.
