Жас мамандар арасында волейболдан турнир өтті
Маңғыстау облысы бойынша меншікті тілші
Түбек теміржолшы жастары өңірде өткізілген волейбол жарысында топ жарды. 16 команда ішінен жүлделі үштіктің қатарынан көрінді.
Маңғыстау облысы жастар саясаты мәселелерінің басқармасының тапсырысы бойынша «Риза ана» қоғамдық қорының ұйымдастыруымен облыстағы кәсіпорындардағы жас мамандар арасында волейболдан турнир өтті. Турнирге түрлі саланың 35 жасқа жейінгі қызметкерлерінен құралған 16 кәсіпорынның командасы қатысты. Екі күнге созылған дүбірлі додада түбек теміржолшы жастары екінші орын мінберінен көрінді. Жеңімпаздар ақшалай сыйлыққа, диплом және кубокка ие болды.
– Волейбол жарысында өңірдің ірі компаниялары мен мекемелерінен келген мықты командалар көп болды. Сондықтан да жарыс тартысты әрі қызықты өтті. Соның ішінде біздің жігіттер де есесін жібермей, жақсы ойын көрсетті. Дегенмен «МАЭК» өндірістік мекемесінен келген қарсыластарынан сәл-ақ артта қалып, екінші орынды қанжығаға байлады. Үшінші орын «Казтранс Ойл» командасының еншісіне тиді, – дейді бұл туралы түбек теміржолшы жастарының өкілі Қуатбек Көпбаев.