Семейлік теміржолшылар шаңғымен жарысты

Семейлік теміржолшылар жылдағы қалыптасқан дәстүрге сай биыл да қарағайлы орман ішінде шаңғы жолымен сайысқа шықты. Бөлімшенің салалық кәсіподақ ұйымының ұйытқы болуымен өткен шараға желі бойындағы қысқы спорт түрлерін серік ететін теміржолшылар мен барша кәсіподақ белсенділері жиналды.

«Қазкөліккәсіп» ҚБ Семей аймағы бойынша өкілі Есен Қажығұлов жиналғандар алдында сөз алып, жылы лебіз білдірді. Шаңғы тебу семейліктердің сүйікті спортттық түріне айналғанын айтып өтіп, жарыс жолында сәттілік тіледі.  

Жарыс ерлер мен әйелдер арасында өткізіліп, спортшылар негізгі және ардагерлер болып екі топқа бөлінді. Осыған дейін де шаңғыны серік ететін семейлік теміржолшы арулар арасында кәсіподақ белсендісі Сәуле Асқарова мен Салтанат Закариянова нағыз шеберліктерін көрсетіп, сөреге бірінші келді. Өз топтарында ПЧ-39 спортшысы Анара Нығметжанова мен НЖС-6 қызметкері Гүлнар Бейсекеева да үздіктер қатарынан табылды.

Ал ерлер арасында ПЧ-40 теміржолшысы Сергей Воронов алдына қара салдырмай мәре сызығын бірінші кессе, екінші орынды ЭЧ-18 мекемесінен Еркін Қабышев алды. Үшінші орынды сәл ғана секундтар артта қалған ВЧД-23 шаңғышысы Мұрагер Қасымханов иеленді.

Егде жастағы сала қызметкерлері де жоғары көрсеткіштерге қол жеткізе алды. Адагерлер арасында бірінші орынды ПЧ-40 спортшысы Мақсұт Түсіпбеков жеңіп алды. Кейінгі орындарды ӘТЖК Семей филиалының қызметкерлері Думан Оспанов пен Дәулетхан Оразбеков иеленді.

Бұл сайыста командалық көрсеткіштер де есепке алынды. 35 ұпай жинаған ЭЧ-18 командасы биылғы біріншіліктің жеңімпазы атанды. Екінші орынды 30 ұпаймен ПЧ-40 командасы иеленсе, үздіктердің үштігін 26 ұпаймен Семей жол дистанциясының әуесқой шаңғышылары қорытындылады.  

Аталмыш шараны ұйымдастырып өткізген жергілікті «Локомотив» спорт клубының нұсқаушысы Наталия Мешкованың айтуынша, биылғы көрсеткіш өте жоғары, теміржолшылардың да ынтасы артқан.

Сайыс соңында барлық жеңімпаздар кәсіподақ ұйымы әзірлеген арнайы грамоталармен, бағалы сыйлықтармен марапатталды.