Тоғызқұмалақтан асық атуға дейін...

Бүгінде семейлік теміржолшылар арасында ұлттық спорттық ойындар сайысын ұйымдастыру жылдан жылға жаңа арнаға ойысуда. Әсіресе биыл оған ерекше басымдық берілуде.

Ұлттық компания бойынша кеңінен қолға алынып отырған «Наурызнама» тұжырымдамасы аясында «Ұлттық спорт» күні кең көлемде өткізілмек. Жоспарланып отырған іс-шаралар өте ауқымды.  

– Биылғы спорттық шара Семей теміржолындағы ұлттық ойындарды дамытудың кезекті бір белесі болғалы тұр. Себебі «Қазтеміржолкәсіп» ҚБ Семей өңірі бойынша кәсіподақ ұйымы ұйытқы болып отырған сайыстар теміржолшылар арасында тоғызқұмалақтан бастап асық атуға дейін қамтиды. Жүлделер қоры өте қомақты. Мақсат – Наурыз мейрамы қарсаңында қазақ халқының ұлттық ойындарын дәріптеу, төл мерекенің мәнін аша түсу болып отыр, – дейді «Локомотив» спорт клубының нұсқаушысы Наталья Мешкова.  

Айта кету керек, осыған дейін бөлімшенің «Локомотив» спорт клубы ұйымдастырған сайыстар тек салалық емес, облыстық көлемде өткен жарыстарға қатысып жүрген талай теміржолшыны танытты. Олардың қатарында ВЧД-23 вагон қараушылары Жомарт Болатов пен Мұрагер Қасымханов, НЖС-6 бөлімшесінен Мәди Нұртаев пен Мәдина Садықова, Семей станциясынан Салтанат Қайрамбаева, ПЧ-39 жолшылары Әділет Ахметжанов пен Аслан Толымбек және Айгерім Бұланбаева, Толқын Әшенова, ШЧ-29 мекемесінен Әділет Жақсылықов сынды ұлттық ойындардың бір шоғыр хас шеберлері бар. «Қазтеміртранс» АҚ Семей филиалының қызметкері, облыстың чемпионы Айгерім Тоқпанованы ерекше атап өтуге болады. Олардың бәрі наурыздың 20 күні бөлімшеде өтетін ауқымды ұлттық ойындар кездесуінде бақ сынамақ. Ұсыныс бойынша теміржолшы қыз-келіншектер арасында кеңінен танымал «бес асық» ойыны да сайыс кестесіне енгізілген.  

Кәсіподақ ұйымы белсенділерінің айтуынша, алдағы уақытта бөлімше көлемінде ұлттық ойындарды дамытудың арнайы бағдарламасы әзірленбек. Оның ішіне садақ ату ойынын енгізу жайлы ұсыныс бар. Жалпы, алдағы уақытта бөлімше көлемінде көшпенділер ойынынан өнер көрсететін теміржолшылардан арнайы команда жасақталмақ.