Жеңіс тұғырында – локомотившілер
Абай облысы бойынша меншікті тілші
Семейлік теміржолшылар арасында допты ойындар бойынша бөлімше біріншілігі жалауын көтерді. Бұл жолғы сайыс спорттың волейбол түрінен өтті.
Байрақты бәсеке бір ай бұрын хабарланғандықтан қатысуға тілек білдірген барша командалар тыңғылықты даярлықтан өтіп, кіл мықтылар ғана іріктелген болатын. Мәселен, желі бойындағы Жарма станциясы өз алдына жеке команда жасақтапты. Біріншіліктің ашылу салтанатында «Қазтеміржолкәсіп» ҚБ Семей өңірі бойынша өкілі Есен Қажығұлов сөз алып, барлық командаға сәттілік тіледі.
Алғашқы кездесуді бөлімше бойынша азулы командалар саналатын ТЧЭ-24 пен НЖС-6 командалары өткізді. Бұл жолы локомотившілердің жолы болды. Сол тәрізді алғашқы іріктеу ойындарын ЭЧ-18, ВЧД-23, ӘТЖК, ПЧ-39 командалары өткізіп, өзара мықтыларды анықтады.
Бұл – шын мәнінде нағыз шеберлік сайысы болды. Ақтық сайысқа бағы жанып, топ жарған екі команда ТЧЭ-24 пен ПЧ-40 ойыншылары шығып, әдемі ойын өрнегін көрсетті. Жанкүйерлердің қиқу салуымен мейлінше тартысты өрбіген кездесу барысында ұпай санымен Семей локомотив пайдалану депосының волейболшылары жеңімпаз атанды. Берік Мұрымбаев, Нұрлан Айтымбетов, Айбек Хасенов, Мейір Садуахасов, Жанат Шаймарданов сынды бабы келіскен әуесқой ойыншылардың сауатты ойыны командаларын алға жетеледі. Ал біріншіліктің бас жүлдесін иелену жолында барын салған Жаңа-Семей жол дистанциясының жігіттері бұл жолы екінші орынды қанағат тұтты. Бөлімшедегі «Локомотив» спорт клубының нұсқаушысы Наталья Мешкованың айтуынша, алдағы уақытта спорттың басқа түрлерінен де сайыстар өткізілмек.