Қазақ балуандары салмағы 276 тонналық екі локомотивті сүйреп әлемдік рекорд орнатты

Аты аңызға айналған Қажымұқан бабамыздың ізбасарларын 21 ғасырда да кездестіруге болады. Қазақстандық балуандар Бауыржан Қамалиев, Айбар Ержанов және Ержан Жақаевтардың әрқайсысы елорда іргесіндегі Локомотив құрастыру зауытында салмағы 276 тоннаны құрайтын екі локомотивті 10 метрге дейін сүйреп, күш экстримінде әлемдік рекорд орнатты. Атлеттердің сөзіне қарағанда әлемге дүрбелең салған короновирус індеті спортшыларға да әсерін тигізбей қоймапты. Жоспарланған халықаралық және республикалық жарыстардың уақыттары ұзартылып, кейін мүлде тоқтатылған. Ал атлеттер үшін спорт – олардың өсуіне, мақсаттарына қол жеткізуге және салауатты өмір салтын ұстануға әкелетін өмір. Сондықтан да спортшылар жаттығусыз отыра алмайды. Сол себепті олар күш экстримімен айналысуға кірісіпті. Ал бір күні оларға күш экстримі бойынша әлемдік рекордты неге жаңартпасқа деген ой келіпті. «Күш экстримі сияқты спорт түрімен карантин басталғанда айналыса бастадым. Бастапқыда жеңіл көлік, джип, фураларды тартып көрдім. Оның бәрі маған жеңіл көрінді. Адам табиғаты қызық емес пе? Мен бұдан да салмақты дүниелерді тартқым келді. Содан мен күш экстриміне қатысты ақпараттарды іздеп тауып, егжей-тегжейлі зерттей бастадым. Қарап отырсам пойызды, ұшақты тартқандар да бар екен. 2018 жылы 274 тоннаны бағындырып, әлемдік рекорд орнатқан ресейлік жігіттер бар екен. Ал біз бүгін 276 тоннаны тарту мүмкіндігіне ие болдық», – дейді Бауыржан Қамалиев есімді балуан. Күш экстримінде бақ сынау үшін дайындалуға балуандарға небәрі үш ай жеткілікті болыпты. Олар спорттың бұл түрімен Локомотив құрастыру зауытында айналысқан. Бастапқыда орташа салмақ дәрежесіндегі 96 тоннаны құрайтын вагондарды тартып көрген. Бұдан кейін ауыр салмақ дәрежесіне, яғни 123 тонналық салмақтағы вагондарға көшкен. Бірақ, бұл цифрлар да олардың көңілін көншіте қоймапты. Сондықтан олар «құласаң түйеден құла» демекші, бірден 276 тоннаны құрайтын екі локомотивті тартуға бел байлапты. Айқын мақсат нақты нәтижеге әкеліп, бағындырған белес 276 тоннаны құрады. «Біз спортшы жігіттеріміздің өтінішін қабыл алып, олардың алаңсыз дайындалуына барлық жағдайды жасадық. Олардың қалай дайындалып жатқанының куәгері болдық. Балуандарымыз кешегі қазақ батырларының жалғасы деп сүйсіндік. Әсіресе, бұл рекордтың Локомотив құрастыру зауыты аумағында орнатылғаны қатты қуантады. Бұл бір тарихи оқиға және өскелең ұрпаққа үлгі боларлық өнеге болды», – дейді «ЛҚЗ» АҚ президенті Марат Тілеубаев. Оның айтуынша, балуандар локомотивтерді тартып жатқанда, зауыттың және спортшылардың дәрігерлері жағдайды бақылауында ұстап отырған. Балуандар орнатқан рекордты «КИнЭС» қазақстандық рекордтар кітабының ресми өкілі Қуандық Құдайберген тіркеп, үш балуанға жалпы салмағы 276 тоннаны құрайтын, ТЭП-33А екі теміржол локомотивін 10 метрге сүйреу бойынша әлемдік рекорд орнатқаны туралы сертификат берілген. Бұл рекорд алдағы уақытта «КИнЭС» қазақстандық рекордтар кітабына тіркеліп, жарық көретін болады.